Marin a inkhel thei rih lo

Tun kar chhungin World Championship 2021 khelh a ni dawn a, world number 1 hlui leh vawi thum champion tawh ni bawk Carolina Marin chu a khup hliam vangin a la inkhel thei dawn lo.

Kumin tir lama khelh Swiss Open-ah Marin hi a inhliam, a hnu lamah inelna pangngai a la khel leh thei lo. All England leh Olympic meuh pawh a khel thei lo a ni - tun hnaiah training nei ve leh tawh mah se inkhel turin a la inpeih lo.

Spanish star Marin chuan, "Season bul kan ṭan fuh hle a, tournament ka khelh hmasak panga zinga paliah ka champion thei. Mahse, thil pawi tak pakhat a thlen hnuah erawh champion chu sawi loh inelna pawh ka la hmachawn thei lo a ni.

"Tunah chuan engtik hunah nge ka lo kir theih dawn tih pawh chiang takin ka sawi duh tawh rih lo," a ti. Kum 2019 khan Indonesia Masters final-ah a khup hi a lo hliam tawh bawk a, vawi khat aia tam a hliam tak avangin indim a ngai hle.

World Championship-ah hian champion lai chu PV Sindhu a ni. Indian shuttler erawh hliam leh harsatna nei loin a inlan thei dawn a, nomawi a kawl lai chu humhim ngei a tum thu a sawi chhuak.

Sindhu hi tun hnaiah French Open, Indonesia Masters leh Indonesia Open-ah ṭha takin a khel vek a, mahse semifinal thleng vek mah se final a lut zo lo vek thung. Tun ṭumah chuan champion nawn a tum.