Curry-a'n record a siam ngei dawn

Stephen Curry chu NBA huanga 3-points vawm lut hnem ber a ni dawn, record ding lai tluk turin 3-points vawi khat vawm luh chiah a mamawh tawh - tuna a khelh dan thlir chuan tukina New York Knicks nen an inkhelh hunah record a siam a rinawm.

Nimin zing NBA regular season inkhelah Curry hian 3-points vawi nga a vawm lut leh a, basketball inelna sang berah hian vawi 2,972 zet a nei ta. Record nei ṭha ber Ray Allen a phak lohna chu vawi khat chiah a ni.

Golden State hian Curry-a point 26 neih hmangin Indiana Pacers chu 102-100 in an hneh a, season kal laia vawi 22 an chak tlinna niin; anni aia chak hnem an awm lo - Western Conference hmahruaitu an ni chhunzawm zel.

American point guard Curry chuan, "Basketball khelh hi nuam ka ti a, team anga hnehna chan chu a pawimawh ber ni mah se record siam theih pawh duhthusam a ni ve bawk," tiin a sawi a, record ṭha tak neih ngei a duh.

Warriors coach Steve Kerr chuan, "Tun hnaia Curry inkhel hi kan en a nih chuan Allen-a khum a tum mah mah em ni chu aw, tih theih a ni, chutih rualin a thil tihte hi team tana ṭha tur zel a ni thung. Record thar a siam hunah chuan pressure nei loin a khel leh zual ang," a ti.

NBA Results
Golden State Warriors 102 - 100 Indiana Pacers
Phoenix Suns 95 - 111 LA Clippers
Boston Celtics 117 - 103 Milwaukee Bucks
Denver Nuggets 113 - 107 Washington Wizards
Atlanta Hawks 126 - 132 Houston Rockets
Cleveland Cavaliers 105 - 94 Miami Heat
Toronto Raptors 124 - 101 Sacramento Kings
Memphis Grizzlies 126 - 91 Philadelphia 76ers
Dallas Mavericks 120 - 96 Charlotte Hornets