PSG tan thih thlengin ka bei ang - Ramos
Paris Saint-Germain defender Sergio Ramos chuan a club hlui Real Madrid hmachhawn dawn mah se khawngaihna lantir a tum loh thu a sawi a, "Ka thih thlengin PSG tan ka bei ang," a ti.
Thawhṭanni zan khan Champions League last 16-a inhmachhawn tur team pawh a ni a, a tirah Real Madrid leh Benfica chu inhmachhawn tura tih ni mah se tihsual a awm vangin pawh ṭhat a ni a, Real leh PSG an inkhel dawn ta.
Ramos chuan, "Real ka hmangaihzia leh ka thinlunga hmun an chan reng dan chu in hria. Mahse, tunah chuan PSG tana theihtawp chhuah tur ka ni tawh a, ka club tan ka theihna zawng zawng ka hlan dawn - a ṭul chuan PSG tan hian ka nunna pawh ka hlan mai ang," a ti!
Mangṭha Real
Kum 35 mi Ramos hian kum 2005 khan a seilenna club Sevilla chhuahsanin Real a pan a, Santiago Bernabeu-ah legend a ni zui - Real tan season 16 khelin inelna hrang hrangah match 671 a khelhsak a, defender ni chungin goal 101 lai a khung thei.
Spain tana vawi 180 ngawt inlan thei defender hian Real tan La Liga (5), Copa del Rey (2), Spanish Super Cup (4), Champions League (4), UEFA Super Cup (3) leh FIFA Club World Cup (4) nomawi a chawi a, a sulhnu a ropui hle.
Ramos chuan, "Real hmachhawn loh hi ka duhthusam chu a ni a, mahse, Santiago Bernabeu-a kir hi ka tan hun hlimawm tak a ni thei. Covid-19 avangin mumal takin fan-te pawh ka mangṭha lo a ni," a ti a, a club hlui hmachhawn chu fan-te mangṭhana remchangah hman a tum.
Ramos & hliam
Real captain hlui hian a beisei ang erawhin hun a hmang thei bik lo - PSG a pan hnuah chawn hliam vangin a talbuai a, French club tan match khat chiah a la khel. Tunah pawh a inhliam mek.
Ramos chuan, "Hrehawm ka ti a, ka career-ah hetiang hi ka la tawn lutuk loh avangin harsa pawh ka ti. A pawimawh ber erawh player rilru put leh a ni. Thim leh khawharna hian hun tam zawk chu min bawh a ni ber a, mahse, chu chuan harsatna paltlang turin min chher hriam a ni.
"Chu chauh a ni lo a, min hmangaih tak tak tu leh a der maia min hmangaihtute pawh min thliar thiamtir a ni," a ti a, a hliam chu hrehawm viau mah se malsawmnaa a chhiar thu a sawi.
Hmangaih hmasa
Ramos-a'n Real a chhuahsan dawn khan mi tam tak mak tih a hlawh - a nihna takah chuan Spanish defender hian cham a duh a, mahse, Real nen an inrem thei lo. Ramos-a'n kum hnih contract a phut a, club president Florentino Perez-a'n hetianga rei contract hi a pe duh lo.
Spanish centre back hian Real a chhuahsan dawn khan, "Bernabeu chhuahsan hi ka duh ngai lo a, cham hi ka duhdan a ni. Mahse, club hian ka hlawh tihniam chunga kum khat contract ziak turin min ti. Sum hi ka buaina a ni lo a, contract erawh kum khat aia rei ka duh.
"Kum hnih dang contract ziah ka duh a, a phu pawh ka phuin ka inhria. Mahse, tunah chuang kawng thar zawh a ngai ta. Contract min zawrh hian ka ziah lawk loh chuan tawp hun a lo nei reng tih pawh ka hre lo," a ti a, Real hneh hi a châk ang tih a chiang.