Frenkie de Jong a chhuak dawn lo

Barcelona midfielder Frenkie de Jong-a pa John de Jong chuan a fapa chu European club lianten dawr mah se a chhuah a rin loh thu a sawi a, De Jong chuan, "Europe-a club lian pangaten rawn dawr mah se tun hnai maiah chuan a chhuak lo ang," tiin a fapa chungchang hi a sawi.

Kum 24 mi Frenkie de Jong hian kum 2019 khan Ajax aṭangin Barcelona hi a zawm a, Catalan club a zawm hun erawh a fuh lo - Copa del Rey nomawi chiah a la chawi a, tuna chhuak tur anga sawi a awm chhan pawh sum lama Barca talbuai vang a ni.

Mahse, John chuan, "Barcelona-in pawisa an mamawh tih ka hria a, Frenkie an hralh chuan sum tam tak an hmu thei dawn tih pawh ka hria. Mahse, tun maiah chuan an inhralh ka ring lo," a ti.

De Jong-a pa chuan a fapin Barcelona nuam a tih thu sawiin, "Stadium hnaihah in an chei thar a, nuam a ti hle. Keipawhin ka tlawh fo a, ka fapa hming chuanna jersey ha chunga mi za telin stadium an pan lai ka hmu fo.

"Catalan ho hian ka fapa hi an ngaina em em a, a chang chuan mumang emaw ka ti zawk hial ṭhin," a ti a, Barcelona tana khel phak a fapa a chhuan hmel hle.

De Jong hian Barca a pan hnuah inelna hrang hrangah match 112 khelin goal 10 a khungsak a, assist vawi 14 a nei tawh bawk. Kum 24 mi lek a la nih avangin hmabak a nei êng a, Manchester United leh Bayern Munich te chu Dutch midfielder duhtu langsar zual an ni.