Arteta-a'n Pepe a beisei sang

Arsenal manager Mikel Arteta chuan Nicolas Pepe khelh danah a lawm thu a sawi a, chutihrualin club player manto ber chu innghahna tlak ni turin ngelnghet deuh taka che ṭha turin a beisei.

Pound maktaduai 72 man Pepe hian FA Cup quarterfinal-a Sheffield United an hneh ṭumin goal a khung, season kal laia inelna hrang hrangah goal riat a khung bakah assist vawi riat bawk a nei tawh. Arteta chuan, "Tun hma chuan Pepe hi ka hre ngai lo, ka hriat chinah erawh theihna nei sang leh danglam bik tak a nihzia ka hria. Player zawng zawngin inkhelah danglamna lian tham an siam thei lo, ani erawh a ti thei zinga mi a ni.

"Hmasawn ngaihna tur lai tam tak a la nei a, a zir zel bawk ang. Player puitling ni tur chuan vawi khat chet fuh hluai a tawk lo, match zawng zawng a theih loh a nih pawhin ngelnghet deuh taka khelh tluan a pawimawh," a ti.

Covid-19 len hnuah Gunners hi an match hmasa pahnihah an chak lo, tunah erawh an match hnuhnung pahnihah hnehna an chang leh tawh; inrintawkna an nei leh ṭan mek - zanin dar 10:30 hian Premier League khel turin a hniam bera awm Norwich City an mikhual ang.