Vawiinah MFA Super Cup final ; Chanmari Vs Chhinga Veng
Lalbiakliana MFA Super Cup final chu vawiin tlai dar 2:30 hian Chanmari leh Chhinga Veng ten Lammualah an khel dawn. Champion lai Chhingcows leh MFA Super Cup hmasa pahnih champion thei Chanmarians inhmachhawn tur hi 'Dream Final' tiha sawi theih a ni.
Chhinga Veng an lian zawk!
Chhinga Vengin nomawi duhin season liam ta khan MPL-a Chanmari FC champion puitu coach Lalsangzuala Hmar an la chhuak a, an tifuh hle.
Sanga hnuaiah Chhinga Vengin MFA Super Cup an champion nghal a, Chanmari FC erawh first round-ah an tla nghal. Nomawi nena hming inhmeh tak ni ṭhin Chanmari FC-in I Day Football final an thleng nghal tho a, amaherawhchu Chhingcows-in an nomawi beiseina an tihtawp sak.
Nikum I Day Football final-ah Chanmariin goal an khung hma zawk a, amaherawhchu team ṭha zawk Chhinga Vengin 2-1 in a lehthal. MPL ṭan hma hauhin Sanga hoin nomawi pahnih an chawi tawh.
MPL-ah pawh thawnthu ngai bawk ziah nawn a ni a, Chhinga Veng-in league round-ah ṭum hnih Chanmari an hneh hnuin semifinal-ah Chhingcows bawk an chak. Chanmari FC-in an coach hlui Sanga enkawl Chhinga Veng hi vawi khatmah an hneh lo.
One-season wonder?
Season khat chhung che ṭha vul a, chuai leh ṭhin hi 'one season wonder' an ti ṭhin. Chhinga Veng hian Mizoram Police recruitment vangin an player ṭha an chan nual a, ISL club lamin an champion-na kawnga an player pawimawh R. Laldinliana an laksak bawk.
Chhinga Veng ropuina hi kum khat daih chauh a ni thei a, chutihrualin MFA Super Cup an chawi a nih chuan Sanga hian player ṭha ber kawl lo chungin pawhin nomawi a chawi thei tih a nemnghet ang.
Ropuina laklet hun
Chanmari FC-in Lalruatliana Sailo (Tawia) hnuaiah an indin thar chho mek a, tun inelnaa squad nei chhah ber ang hiala sawi theih a ni. Season liam ta khan anmahni aia sum hmang hnem Chhinga Veng lakah MPL nomawi leh an ropuina an chan a, tun ṭum hi laletna hun ṭha a ni.
Amaherawhchu, vawiin hian defender pawimawh C. Lalrosanga chu hrem vangin a inlan thei dawn lo a, 2017 National Junior Championship-a Mizoram final thlentu puitu defender Lalmuanawma tan a theihna pholan theihna hun ṭha a ni thei ang.
Tlarhma lamah erawh Chanmari an ngaihtuah awm loh. Chhinga Veng aṭanga an lakluh Laldampuia chu rinrawl ber a ni a, a thlawp turin Lalmuanzova leh Vanlalbiaa Chhangte te an awm. Winger ṭha Ṭhasiama leh Khelo India best player Lalnunzama te pawh bench-ah an dah thei a, Shillong Lajong aṭanga an lakluh Jeremy Laldinpuia hrem tawk mah se buaina tur a awm lo.
Tawia hian midfield a rem fuh viau bawk. Chanmari midfield-ah hian Lalnuntluanga, Lalhriatpuia leh KC Larchhuakmawia te an awm a, tualchhung football-a tawnhriat nei ṭha vek an ni a. Inkhelah winger langsar ṭhin mah se midfield hi Chanmari chakna laiah a ngaih theih.
A awlsam dawn lo
Chhinga Veng hi team sheet-ah Chanmari aiin nem hret mah se Lalrammuanpuia leh MS Dawngliana te tlarhmaah an kawl miau avangin eng team pawh hneh thei an ni.
Chhingcows player-te hian champion rilru an pu tawh a, final thleng tura player 10-a khel chunga Mizoram Police an lehthal danah pawh an huaisenna a lang. Chanmari hian awlsam taka Chhinga Veng hneh an tum a nih chaun a tisual dawn a, champion tur chuan mipui puihna a an mamawh tel ang.
Chhinga Veng erawh squad nei chhe zawk an nih avangin Chanmari ai mahin ṭantu an mamawh zawk. Team pahnih hmaah nomawi a inchhawp a, season khat tawp nomawi chawi tawh lo Chanmari nge Chhinga Vengin kum zawnin an champion dawn tih chu vawiin hian a hriat ang.
Final
Vawiin inkhel tur
Chanmari 2:30 PM Chhinga Veng
An intumna hnuhnung Panga
I Day Football Final 2017
Chanmari FC 1 - 2 Chhinga Veng
CFC: Jakob Vanlalhlimpuia 2'
CVFC: Lalrammuanpuia 56';
MS Dawngliana 101'
MPL6
League Round
Chhinga Veng FC 1-0 Chanmari FC
CVFC: Lalkhawpuimawia 59'
MoM: Lalrinchhana, CVFC
Chanmari FC 1-2 Chhinga Veng FC
CFC: Joe Zoherliana 12'
CVFC: MS Dawngliana 64', 76'
MoM : MS Dawngliana, CVFC
Semifinal
Chhinga Veng FC 1-1 Chanmari FC
CVFC: Joseph Lalfakzuala 77' (OG)
CFC: MC Malsawmzuala 45' (P)
MoM: F.Lalmuanawma, CFC
Chanmari FC 1-3 Chhinga Veng FC
CFC: MC Malsawmzuala 36'
CVFC: R.Malsawmtluanga 19' K.Lalthlahlova 85' Malsawmfela 88' (P)
Agg-ah Chhinga Veng 4-2 in an chak