Chelsea-in Hazard an zuar lo

World Cup zawh rualin Eden Hazard-a'n hriatthiam theih tur takin Stamford Bridge chhuahsan chungchang sawi mah se Chelsea chuan an thiampuipa hi chhuahtir tumna an nei lo.

Daily Mail tarlan danin Hazard hian Chelsea-a contract thar ziak tura sawm a nihna chu a la hnar rih a, Blues hian Belgium captain hi kar khata £300,000 hlawh turin contract thar an zawrh niin an sawi.

Real Madrid chuan Cristiano Ronaldo an hralh hnuah Hazard hi Portuguese forward hmun ruak luah turin an duh nia sawi a awm a, hetihrual hian Real-in an ngamna zat nia sawi pound maktaduai 150 nen pawh dawr ni se Chelsea hian chhuahtir an tum loh thu club chhungkuaa mi, a hming tarlan loh chuan a sawi.

Kum 27 mi Hazard hian 2012 khan Lille aṭangin Chelsea hi a zawm a, Premier League nomawi vawi hnih chawipui tawhin match 300-a inlan sakah goal 89 a khung sak.

Chelsea hi Australia-ah pre season friendly match khel turin an awm mek a, World Cup khel chau Hazard hi coach thar Maurizio Sarri kaihhruai team-ah a la tel rih lo.