Hockey World Cup-ah Lalremsiami ; India leh England inhnehtawk
Lalremsiami Hmar Zote chu Mizo zinga Hockey World Cup khel hmasa ber a ni ta. Inrinni zan khan India nula ten Women’s Hockey World Cup 2018-a an match hmasa ber khelin inelna thlengtu England nen 1-1 in an inhnehtawk.
Lee Valley Hockey Centre, London-a inkhelah India tan midfielder Neha Goyal-i'n minute 25-naah vaw goal in hma an hruai a, hun tawp nan minute sarih chauh a awm tawh tihah England lamin Lily Owsley hmangin an sut a, point khat ve ve an hmu.
Pool B inkhel dangah Ireland chuan United States lakah 3-1 a hnehna changin point thum an hmu thung. India hian July 26 zanah Ireland hi an hmachhawn leh dawn a, point la hmu lo US leh England te an inkhel zui ve leh bawk dawn a ni.
Goal hnih chu
India leh England te hi April thla khan 2018 Commonwealth Games-ah an lo intawng tawh a, pool match-ah India 2-1 in an chak. Mahse, ram pahnihte hi bronze medal inchuhna inkhela an intawn leh meuh chuan Olympic champion England hian 6-0 ngawtin hnehna an chang let.
Hockey World Cup-ah a thlengtu England hi rinkai zawk niin, inkhel pawh an thunun hneh hle. Penalty corner an hlawh chhuak fo a, mahse India goalkeeper Savita leh a dinpui defender pali te an chesual duh lo, vawi nga ngawt a dan sak.
India lamin an hun ṭha neih hmasa an chhawr ṭangkai, England goal bula an buai zeuh karah midfielder Neha Goyal-i'n awlsam tein a khung a, he goal hmang hian India an chak dawn niin a lang hman. Mahse, hun tawp dawnah England lamin penalty corner hmu lehin defender Deepika ball vuak chhuah ṭha tawk lo dawng fuhtu Owsley chuan si phurh sut nan a hmang.
England goal nawr na tak lakah India tlarhnung a phui ṭha a, keeper leh vice captain ni bawk Savita chu kulhpui nghet an ni. Penalty corner hmasa vawi nga ngawt an dang thei a, attacking game hlauhawm kheltu England lakah an buai duh lo.
England lamin chak loh an duh lo, hun tawp dawn lamah privilege goalkeeper an hmang hial. He danah hian keeper chu 'D line' chhungah keeper pangngai angin a khel a, a pawnah erawh player dang angin a khel thei bawk–goal khung mamawh tawpah hman ṭhin a ni; an mamawh goal khat an hlawhchhuah phah bawk.
India beiseina
India team zingah tawnhriat nei ṭha an la tam lo a, captain Rani Rampal leh defender Deepika te chiah World Cup khel tawh an ni a, player dang tan erawh khawvel thar a ni–an match hmasa bera an khelh dan thlir chuan round sang zawk lut turin beiseina a awm.
World number number 10 nichungin India hi an inlan a, an khingpui England erawh number 2 niin a thlengtu an nih bawk vangin champion tura rinkai an ni. Team ṭha leh tawnhriat ngah zawk hmachhawn mah se India coach Sjoerd Marijne-a'n a naute a remkawm thiam hle.
Match vawi hnihnaa India hmachawn tur Ireland hi ranking lamah chuan 16-na an ni a, Pool B aṭanga team nem ber tura ngaih an ni. Mahse, Ireland hian an match hmasa berah world number 7 US chu 3-1 in an sawp thei a, India tan fimkhur a ngai dawn.
Pool khata team pali hi an inkhelh kual hnuah a sang berin quarterfinal an lut ang a, pahnihna chuan playoff an khelh a ngai dawn. Point hmu hniam pahnih tan erawh knock out stage chinah hmun a awm ve dawn tawh lo a ni.
India Squad
Goalkeepers: Savita (vice-capt), Rajani Etimarpu.
Defenders: Deep Grace Ekka, Sunita Lakra, Deepika, Gurjit Kaur, Reena Khokhar.
Midfielders: Namita Toppo, Lilima Minz, Monika, Udita, Nikki Pradhan, Neha Goyal.
Forwards: Rani Rampal (capt), Vandana Katariya, Lalremsiami, Navneet Kaur, Navjot Kaur.
Thlirna Tawi
A hun : July 21 – August 5
A hmun : Lee Valley Hockey Centre, London
Teal tel zat : 16
Pool A: China, Italy, Korea, Netherlands
Pool B: England, India, Ireland, USA
Pool C: Argentina, Germany, South Africa,
Spain
Pool D: Australia, Belgium, Japan, New Zealand
India Results & Fixtures
July 21, Inrinni
India 1–1 England
IND : Neha Goyal 25'
ENG : 54'
July 26, Ningani
India 6:30 PM Ireland
July 29, Pathianni
India 9:30 USA
Mizo nula Siami
India tan kum naupangte nichungin Lalremsiami koh a ni ṭhin a, tun World Cup-ah pawh senior player ṭha leh tawnhriat ngah tak tak karah koh a ni. England lakah Siami hian inkhel bul a ṭan lo a, hockey danah chuan substitution duh zat zat siam theih a nih avangin Mizo nula tan buaina tur a awm lo.
Kolasib forward Siami hi kum 18 mi chauh a la ni a, India squad-ah player naupang ber niin hetichung hian ram tan match 20 a khel der tawh. A elpui Rani erawh match 213 khel tawh a ni a, forward dang Vandana Katariya (201 matches) pawh a nep lo hle–India hmecihhe hockey team zingah pawh tlarhma lama khelh phak hi thil awlsam a ni lo tih a chiang.
Quarter hnihna an khelh aṭangin khelmual chhungah Siami a inlan a, Thenzawl Hockey Training Centre aṭanga bul ṭantu hian hla deuh hlek aṭangin a hlap goal teuh hle. Quarter linaah pawh Siami bawk hian hun ṭha a nei leh, forward Navneet Kaur hnen aṭanga a ball hmuh chu keeper chauh a hmachhawn tawhah tlu pahin a vaw hram a, mahse a hlah hloh – goal se la chuan India chak nemngheh theihna tur a ni.
Goal khung lo mah se Siami theihna san zia hmuh hmaih theih a ni lo, Mizo nula hian chak takin ball a tlanpui thei a, a hunah a hum thei bawk. India-in goal an khung theih nan pawh English defender lian tak tak lo chhaih buaiin Goyal tana hmun awl siamsaktu a ni thei.
India tana Asian Cup champion pawh ni tawh Siami chuan, "World Cup meuh chu a ropui khawp mai. Hun ṭha vawi hnih ka neih ka hlah kha ka ui takzet a, Pathian leh kan ram tan theihtawp ka chhuah zek ang," tiin Vanglaini a hrilh. Nun kawng innghah nana Sam 37-na hmangtu Siami hian India tan sulhnu ropui a hnutchhiah zel a nih pawhin a mak lo ang.