Pjanic leh Arthur an inthleng

Juventus midfielder Miralem Pjanic chuan Barcelona a zawm dawn a, hetihlai hian Barca midfielder Arthur chu Turin khawpui lamah a kal ve thung ang. Spanish leh Italian club lian pahnihte hian an player kawl lai chu an inthleng dawn tihna a ni.

Kum 30 mi Pjanic man atan Barca hian pound maktaduai 54.9 an hmang dawn a, pound maktaduai 4.6 chu pek belh theih a ni bawk ang. Kum 23 mi Arthur hi pound maktaduai 66 man niin, pound maktaduai 9.1 danga pung leh thei a ni bawk.

Pjanic hian 2023-24 season thleng daih contract a ziak, a lei chhuak duh tan chuan pound maktaduai 365 hman a ngai ang; a hlawh zat tur tarlan a ni lo. Arthur contract rei zawng hi kum nga chhung atan tih a ni a, Catalan club-a a hlawh let khata tam a hlawh dawn, tunah hian kar khatah £84,000 (Rs nuai 77) a hlawh.

Bosnia international leh Brazil international te hi tun season chhung chu an club pangngaiah an khel tluan dawn a, season tharah an khelhna hi an inthlak ang. Covid-19 vangin season kal lai hi July thlaah an zawh hman hmel loh a, August thlaah club thar an zawm ang.

Barcelona chuan 2018 July thla khan Brazilian club Gremio aṭangin kha tih laia kum 21 mi Arthur chu pound maktaduai 35.5 in an lalut a, Nou Camp-ah season ruk daih contract an ziahpui - captain chhuak ta Xavi Hernandez hmun ruak luah thei tura beisei a ni.

Theihna a nei sang a, a kum a la naupan bawk avangin a lakah beiseina a sang hle. Lionel Messi pawhin Xavi nen an khelh dan phung inang tak leh khelmual chhunga a chetla vel hmuhnawm a tih thu a sawi hial. Mahse, khelmual pawnah neuh neuh a nei zauh zauh. Spanish club tan a season hmasa berah league match 19 chauhah bul a ṭan a, season kal laiah pawh match 14 chauh a la khel. Coach Quique Setien-a'n tun thla tir khan a player hian beisei a phak loh thu a sawi.

Kum 2019 tir lam khan Paris khawpuiah Brazil tana a khelhpui Neymar piancham lawmin a kal a, club thil pawimawh ni lem loa a zin hian sawisel a hlawh - a hnuah ngaihdam a dil. Nikum December thla khan a ṭhal bawr hliam vanga a chawlh laiin vur tawlhna hmunah hun a lo hmang leh lawi si.

Xavi leh Andres Iniesta te awm loh hnuah Barcelona midfield-in ngai a la awh leh thei lo a, pound maktaduai 100 chuang veka an lakluh Ousmane Dembele, Philippe Coutinho leh Antoine Griezmann ten beisei an phak lo vek a ni.

Barcelona inkhel khaikhawmtu ni tur chuan ball thiam, che rang leh hmathlir thui tak nei bawk - thiam bakah 'player fing' nih tel a ngai. Miralem Pjanic hi chutiang ni thei tura ngaih a ni, Juve tan kawng hrang hrangin a thiamzia a

lantir tawh; freekick a pet thiam bawk.

Squad chhah tawk tak Juventus-ah pawh Pjanic hi rinrawl a ni thei a, a bik takin goal an nawrna kawngah chuan ani aia duhthlan tur dang vak an awm chuang lo ang. A kum a tam deuh tawh avangin nakin ai chuan tun hun atan a ni ang.

Juve tan match 171 a khelh aṭanga goal 22 khungtu Pjanic chuan, "Ka hlim takzet, Barca tan ka theihna zawng zawng ka hlan ang, kan inhmu thuai dawn nia," a ti. Old Lady coach Maurizio Sarri pawhin Pjanic chu Barca a zawm theih avanga a lawm a rin thu a sawi bawk.