Spurs tan Son & Lamela an nghet

Tottenham Hotspur forward pahnih Son Heung-min leh Erik Lamela te chuan London club-ah hun rei zawk hman tumin contract thar an ziak.

Son hian kum 2023 thleng cham turin contract thar a ziak a, Lamela hian kum 2022 thleng cham chhunzawm turin a ziak thung. Player pahnih hian an contract hi an hmang zo a nih chuan Son hi kum nga a cham belh ang a, Lamela hi kum li dang a cham thung ang.

South Korea international Son hian kum 2015 khan Bayer Leverkusen aṭangin Spurs hi a zawm a, match 140-a inlan sakah goal 47 khung tawhin a kum telin a hmasawnna hmuh tur a awm.

Kum 2013-a AS Roma aṭanga Spurs pantu Lamela hian match 154-ah goal 23 a khung thung a, mahse hliam vangin tun hnai thla 18 chhung a inlan tam thei lo a, November khan hliam vanga a chawlh reng hnuah a lo kir ve chauh a ni.