Hart-a'n City chhuahsan hlen a duh

Manchester City goalkeeper Joe Hart chuan Etihad Stadium a chhuahsan leh a nih chuan loan ni loin a ngheta chhuahsan a duh thu a sawi.

Kum 31 mi goalkeeper hian 2016-a Pep Guardiola-a'n City a enkawl hnuah match khat chiah a la khel a, Torino leh West Ham-ah te loan hmanga chhuahitr a ni.

Hart chuan, "World Cup khelh ka duh avangin loan-in vawi hnih ka chhuak a, mahse chu thutluknain min thlen chin chu kan hria a ni," tiin Russia-a hruai ve loh England goakeeper chuan a thutlukna a fuh loh thu a sawi.

England tana vawi 75 inlan tawh goalkeeper chuan, "Ka club khelhnaah player pawimawh nih ka duh a, chumi tur chuan loan player niloin player nghet nih ka mamawhin ka hria. Tunah chuan eng league pawh ni se khelh ka duh vek a, ka tana ṭha ber tura thutlukna ka siam a ngai a ni," a ti.

Hart hi Euro 2012 leh 2016-ah England number 1 a ni a, World Cup 2014-ah khan first choice goalkeeper a ni bawk. Kumin World Cup-ah erawh hruai a ni lo a, a hmun ruakah Jordan Pickford a khel ṭha takzet bawk.

Mahse, 2010 aṭanga 2014-15 season thleng a zawna Premier League Golden Glove dawng thei goalkeeper chuan, "Kum 31 mi chauh ka la ni a, ka naupang a, ka in fit a, ka tha a za em em reng bawk. England keeper ni leh turin theihna ka nei a ni," tiin international football chawlhsan lam a la hawi lo.

City boss Guardiola chuan Hart-a chungchang hi chinfel thuai tuma hma an lak mek thu a lo sawi tawh. City hian Inrinni zan khan pre-season friendly match-ah Borussia Dortmund chu Mario Gotze penalty goal hmangin 0-1 in an ngam lo a, second half-ah Hart hi luhtir niin goal a chhuah lo.

Hetihlai hian khawthlang media-te chuan City-a kum khat contract la nei Hart hi Chelsea chuan pound maktaduai ngaa lakluh an tum dawn nnin an tarlang a, Real Madrid pan tur anga sawi Thibaut Courtois thlak turin an duh niin an sawi.