Roma neitupa UEFA-in hrem

Europe-a football thuneitu sang ber UEFA chuan AS Roma neitupa James Pallotta chu thla thum chhung atan an hrem a, hetih chhung hian European football-a match reng reng Pallotta hian a hmunah a en thiang lo.

UEFA hian Roma hotupa bakah hian a club chu £17,025 chawi turin an hrem bawk. Roma hian Champions League semifinal-ah Liverpool an ngam lo a, inkhelh zawh hnuah Roma neitu Pallotta hian match official te chu 'nuihza bur an ni' tiin duh tui lo takin a sawisel a, a ṭawngkam vang hian hrem a ni.

Roma-in pawisa an chawi tir chhan hi Liverpool an lo mikhual danah an tih ṭhat tawk loh vang a ni a, inkhelh laia fan-ten gate pakhat an dan leh phal loh halmawi an lo hal vang te pawh a tel.

Season hman zawh tak Champions League semifinal-ah khan Liverpool hian first leg-ah 5-2 in Roma hi an hneh a, second leg-ah 2-4 in tlawm zui mah se inkhel pahnih belhkhawmah 7-6 in an chak.

Anfield-a team pahnih inkhelh hmasa zawkah khan Roma hi an fan-ten buaina an siam avangin £43,632 chawitir an lo ni tawh a, hemi ṭum hian Reds fan Sean Cox chuan hliam na tak a tuar a, Italian mi pahnih chu man an ni bawk.