Real Madrid-in Vinicius Junior an tlangzarh

Cristiano Ronaldo an hralh hnuah Real Madrid-in chanchin lawmawm an nei a, pound maktaduai 38.7-a inremna an lo neihpui tawh Brazilian rawlthar Vinicius Junior chu Santiago Bernabeu Stadium-ah an tlangzarh.

May 23, 2017 khan Real hian Vinicius lalut turin a club khelhna Flamengo chu inremna an lo neihpui tawh a, kum 18 a tlin veleha an club zawm turin an inrempui. July 12 khan Vinicius hian kum 18 a tling a, Real a zawm ta a ni.

Real Madrid president Florentino Perez chuan, "Brazil mai ni lo football khawvela player beiseiawm ber pawla an sawi a ni," tiin Vinicius an lakluh chhan a sawi a, ropuina ramah Real a hruai theih a beisei.

Tu nge Vinicius?

Kum 18 mi Vinicius hian Fla­­mengo academy aṭanga a career ṭanin Real hi a club pahnih­na chauh a ni. Kum 2017 khan South American Under-17 Football Cham­pionship-ah Brazil cham­pion puiin top scorer (7 goals) a nih bakah best player atan thlan a ni a, khawvel ngaihven a hlawh ṭan.

Brazil tan age level-ah Under 15 leh Under 17-ah a inlan tawh a, U15-ah hian match 10 khelin goal sarih a khung a, U17-ah match 19 khelin goal 17 ngawt a khung thung. Nikuma India-in FIFA U17 World Cup a thlen khan India leilungah inkhel tura ngaih ni mah se a club khelhna Flamengo-in chhuah an phal loh avangin a kal lo.

Nikum May-a Real nen inremna an neih khan senior football-ah minute 17 chiah a inlan. Mahse, Real nen inremna an neih hnuah Flamengo tan hmun chang chho ṭanin match 37 a khelh sak a, goal li a khung - Real a zawm meuh chuan senior football-ah a tlangnel tawh hle.

Hello Vinicius

Brazil Serie A lamah chuan season an ṭan leh der tawh a, Vinicius hian Flamengo tan a thawhhlawk hle. Serie A-ah match 12 khelin goal li a khung a, assist vawi thum neiin a club hi league table-ah hma a hruaipui mek.

South American Champions League 'Copa Libertadores' lamah chuan Brazilian forward hian match nga khelin goal hnih a khung a, tun season-ah Flamengo tan match 17 khelin goal ruk leh assist vawi thum a nei tihna a ni.

Real president Perez chuan, "Tunah chuan Vinicius hi 'beiseina' mai a ni tawh lo a, thil tak tak a ni tawh," a ti a, season hmasaa inremna an neihpui lai aiin Brazilian forward chu a puitlin tawh zawk thu a sawi.

Vinicius a hlim

Kum 18 mi forward chuan a beisei aia hmaa Real a pan thu a sawi a, a hlim hle. Vinicius chuan, "Footballer tan chuan hei lo liama hun duhawm hi a awm chuang lo," a ti a, football player-te chak ber chu Real pan a nih thu a sawi.

Vinicius chuan, "Kum 18 mi chauh ka la ni a, mahse football-a ka thlen theih sang ber thlengin Real Madrid ka zawm tawh a ni," tiin a beisei aia hmaa thil a kaltluan thu a sawi a, zawhna awm chu beisei a phak ang em, tih chauh a ni ta.

Real hian 2014 khan Nor­wegian rawlthar Martin Ode­gaard chu khawvel sawi hat tling khawpin an lo lalut tawh a, mahse Real tan match hnih bak a la inlan lo. Vinicius erawh a zam phah lo a, "Flamengo-a ka tih theih zawng zawng chu ka ti thei vek ang," a ti.

Rawlthar man to

Pound maktaduai 38.7-a lakluh Vinicius hi khawvela rawl­thar man to pawl a ni a, Manchester United-in Septem­ber 2015-a rawlthar footballer man to ber ni tura pound maktaduai 36-a Anthony Martial an lakluhna man kha a khum.

Hetihrual hian Martial man hi pound maktaduai 58 thlenga sang chho thei tur a ni thung tih hriat tel a ṭha. Rawlthar footballer man to ber ni mai tur erawh Kylian Mbappe a ni a, Paris St-Germain chuan season hmasaa loan hmanga an hawh zet forward hi kuminah a ngheta pound maktaduai 166-a lalut turin Monaco chu inremna an neihpui sa a ni.

"Chhungkaw naran ve tak a-

ṭanga seilian ka ni a, ka kal zelna tura ka chhungte min puihna leh an thil min zirtir zawng zawngah ka lawm takzet a ni," titu Vinicius hi rawlthar manto ber ni lo mah se Real-in 'man to' taka an lakluh a nih miau avangin a chungah beiseina a sang ang.