Europa League khel tur Milan

AC Milan chuan season tharah Europa League an khel thei dawn. Milan hian player lak nan sum an hman hnem vangin Financial Fair Play in kaihhruaina dan an bawhchhia nia ngaih a ni a, mahse Court of Arbitration for Sport (CAS) chuan hrem an nihna hi thu tlingah a ngaih sak lo a ni.

Season hmasa nipui bazar lai khan Milan hian player thar 10 chuang lak nan pound maktaduai 200 an hmang tling a, Chinese sumdawng hausa kuta an luh hnuah an che na rem rem hle. Europe-a football thuneitu sang UEFA chuan Milan chet dan hian Financial Fair Play an bawhchhia niin a ngai a, season thara Europe-a inlan thei lo turin an hrem.

Amaherawhchu, Serie A parukna Milan hian an dikna humhim an tum a, infiamna lama thubuai ngaihtuahtu sang ber CAS lakah an zualko. An nihna tak an chhui hnuah CAS chuan, "Puh an nihna hi anmahni nihna nen a inmil tawk lo," tiin Milan an chhan a, tun hma aiin Italian club chu an sum dinhmun a ṭhat tawh thu leh dan an bawhchhiat loh thu a sawi.

Italian club hlun leh ropui hi 1986 aṭang khan Italian prime minister hlui Silvio Berlusconi kutah a awm a, April 2017 khan Chinese sumdawng hausa kutah pound maktaduai 648 in hralh a ni. Player langsar Leonardo Bonucci leh Andre Silva te pound maktaduai 30 chuang ve vea an lei avangin an sum hman hi a san phah hle a ni.

Financial Fair Play hi UEFA chuan club tin sum hman chungchang thunun nan an hman a ni a, club hausa pakhatin an duh zat zat player an lei bik ngawt loh nana tih a ni. He dan ang chuan club-te chu an sum lakluh leh hmanral chu a inbuktawk thei ang berin a kal tur a ni.