Foxes-ah Ward a kal

Leicester City chuan Liverpool goalkeeper Danny Ward chu pound maktaduai 12.5 in an lalut a, Ricardo Pereira, Jonny Evans leh James Maddison te hnungzuiin tun nipui laia Foxes player thar palina chiah a ni.

Wales tana match li khel tawh Ward hian 2012 khan Liverpool a zawm a, mahse Anfield-ah hmun a chang tam lo. Season hmasa thleng khan club pathumah loan hmangin a chhuak a, season hmasa League Cup-ah Reds nen an inkhelh kha a club tana a khelhna hnuhnung ber a ni ta.

Liverpool hian kar hmasa lawk khan AS Roma aṭangin Alisson Becker chu pound mak­taduai 66.8 in an lei thar a, khawvel keeper man to ber an neih belh takah chuan Ward hi 'fourth choice' tur a ni dawn - khelh phak lohna hmuna awm reng ai chuan hmun a chan tam theihna tur pan a thlang hi a mak lo.

Leicester manager Claude Puel chuan, "Danny hian kan squad a ti chhah sawt dawn a, inelna hautak tak mai Premier League khel tur kan nih avangin player ṭha neih hnem hi a pawimawh hle a ni," tiin a sawi.