Chhinga Vengin Chanmari an ngam
Season liam ta treble champion Chhinga Vengin tualchhung football season thara nomawi chawi theih hmasak ber Lalbiakliana MFA Super Cup-ah an champion nghal.
Nimin tlai Lammuala inkhelah Chhinga Veng hian Lalrammawia goal hmangin Chanmari FC 1-0 in an hneh a, MFA Super Cup nomawi an humhim. Tun season-a inelna khelh hmabak I Day Football leh Mizoram Premier League-ah pawh Lalsangzuala Hmar hote hian inrintawkna an ngah sawt ang.
Game plan chi 2
Chhinga Veng coach Lalsangzuala Hmar-in risk lak duh loin tlarhmaah Lalrammuanpuia chiah a dah a, MPL best forward pawh ni tawh MS Dawngliana erawh midfield-ah Lalrinchhana leh Lalmuansanga te nen an inkawp.
Wing-ah nikum lama hmun pawimawh chang pha lo Shalom Lala leh Lalrammawia te an awm. Tlarhnungah BVT aṭanga lakluh PC Laldinpuia leh mi thar Vanlalzuidika te an inkawp a, mual sirah Hmingthanmawia leh Vanlalchhuanga te an awm. Goalkeeper Zothanmawia'n ho khawm lo se chuan tlarhnung langsar an ni lo.
Chanmari FC erawhin tlarhnungah C. Lalrosanga an chhawr thei lo a, R. Lalawmpuia kawppui turin rawlthar Lalmuanawma dahluh a ni a, Thomas Lalengkima leh C. Lalmuanawma te chu mual sirah an awm a, keeper chu Lalruatpuia a ni.
Lalruatliana Sailo-in midfield pathum chhawr loin striker pahnih a dahlut a, Laldampuia leh Lalrammuana a dahlut a, midfielder zinga tawnhriat nei tlem ber KC Larchhuakmawia dah ṭhain Lalnuntluanga leh Lalhriatpuia te an inkawp a. Winger-ah Lalmuanzova leh Vanlalbiaa Chhangte te an awm a, Chanmari player-te hming a langsar zawk.
A hmuhnawm loh
Final boruak a danglam a, team pahnih an fimkhur - first half-ah chance hmuh tur a awm meuh lo. Midfield-a player dah tam zawk Chhinga Vengin inkhel an thunun hret a, keeper pahnih tana harsa tur a awm lo.
Second half-ah inkhel hmuhnawm hret mah se team ṭha pahnihin mipui beiseina angin an khel chhuak thei lo. Minute 66-naah Chanmari keeper Lalmama hnek chhuah fuh tawk loh chu Rammawia'n mawi zetin a volley a goal a, he goal hi inkhela goal awmchhun a ni zui bawk.
Chanmari hian sut tumin Ṭhasiama, Rochhingpuia leh KC Larchhuakmawia te an luhtir nachungin an goal nawr a nat phah lo a, Chhinga Vengin midfield tichak tura an dahluh F. Zosangliana erawhin a hna a tlin hle.
Fak phu Sanga
Chhinga Vengin an player ṭhahnem tak an chan a, amaherawhchu Lalsangzuala Hmar hoten champion rilru put hmang an pu tawh a, team ṭha lo zawk nichungin final an thunun. Chhingcows hian Mizoram Police nen goal hnih an chhuah tih loh chu tun inelna match liah an clean sheet a, team thawhhona ṭhatna vang a ni a, Sanga game plan a hlawhtling.
Best keeper-ah Zothanmawia thlan a ni a, best defender-ah PC Laldinpuia leh best midfield-ah MS Dawngliana te thlan an ni a, Chhinga Veng player pathumin mimal chawimawina pathum an dawng hi an phu hle. Best forward Dampuia'n tun inelna final hma zawngin match zawng zawngah goal a khung a, goal 13 zet khung mah se Kawrtethawveng tlangval hian a club hlui tlarhnung lakah a che thei lo.
Chhingcows hian Chanmari an hmachhawn hnuhnung parukah vawi khat an inhnehtawk tih loh chu an chak vek a, record en letin danglamna thlentu chu coach Lalsangzuala Hmar a ni.
Last 32
Chhinga Veng FC 3–0 Ramthar Veng FC
CVFC : Vanlalzuidika 2'; Lalthlamuana 7';
MS Dawngliana 48'
Last 16
Chhinga Veng FC 8–0 Armed Veng FC
CVFC : MS Dawngliana 19'; Lalrammuanpuia 23', 40', 43'; Shalomlal-a 24', 63'; F. Lalnuntluanga 55'; Vanlalzuidika 76'
Quarterfinal
Chhinga Veng FC 0–0 Kanan FC
Penalty Shootout-ah Chhinga Vengin 5-4 in hnehna an chang
Semifinal
Mizoram Police 2–3 (a.e.t) Chhinga Veng
MPFC : Lalrinchhana 20' (OG); Lalsangbera 27'
CVFC : MS Dawngliana 31' (P), 59'; Lalmuansanga 112'