Infiammi beiseiawm 734 thlang chhuak ; Enkawl bik tur zingah Mizo 16 an tel

Khawvel huap ngaihtuahin infiamna huangah India dinhmun a sang tawk lo a, sorkar laipui chuan nasa taka hmasawn theih nan ruahmanna a duang. Sports Authority of India (SAI) chuan Khelo India Talent Identification Development scheme hnuaiah ram chhunga infiammi beisei awm 734 a thlang chhuak a, heng a thlan chhuahte hi Olympic thlenga inlan thei turin chher a tum - thlanchhuah zinga player 16 chu Mizo an ni.

Khelo India Talent Identification Development scheme hnuaiah hian player thlan chhuahte hian kum khatah stipend atan Rs 1,20,000 zel an dawng dawn a, an sum hmuh hi mimal inenkawl nan leh pawimawh dang atan an hmang thei ang. Player thlan chhuahte hi ram chhunga Sports Authority of India (SAI) ṭhenkhat bakah, sorkar laipui hriatpui hnuaia state leh mimal academy ṭha tak takah an inzir dawn.

Sports Minister Rajyavardhan Rathore chuan, "Catch them young tih hi au hla satliah mai ni loin a takin kan kalpui. Sports kalphung kan ti hmasawn a, tualchhunga mi ṭha tak kha khawvel hriat turin kan phochhuak dawn a ni. He thil hian India ram chhunga infiammi tu pawhin theihna a neih chuan hlawhtlinna kawng zawh turin kawng a inhawng tih a pholang," a ti.

Tak tam zingah

India ramah mipui vaibelchhe 132.42 vel kan awm mek a, kum 2011 chhiarpuia a lan dan chuan Mizoramah mipui 1,097,206 vel chauh kan awm thung. Player 734 thlan chhuah zinga 16 tel hi Mizoram tan chuan chanchin ṭha tak a tlingah a ngaih theih.

January 31 aṭanga February 8 chhung khan New Delhi-ah Khelo India School Games neih a ni a, Mizoram State Sports Council kaihhruaina hnuaiah infiamna chi hrang panga - football (mipa leh hmeichhia), boxing, weightlifting, wrestling leh judo-ah te player 43 a tir chhuak; he hun aṭanga hian player ṭhenkhat chu thlan nghal an ni a; ṭhenkhat erawh a hnuah trial nei tura koh leh an ni.

Mizo infiammi zingah Table Tennis huanga India number 1 Jeho Himnakulhpuingheta chu trial-na lamah che ṭha viau mah se SAI-in an thlan hming an tarchhuah zingah a tel lo a, Mizo player hian E-mail hmangin a tling tih hriattirna a dawng tho. Khelo India School Games neih zawh taka weightlifting huanga silver medal chawi chhuaktu Zakhuma pawh list-ah tel lo mah se a tling tih hriattirna a dawng ve bawk - anni pahnih hi an tel leh a nih chuan Mizo 18 an awm dawn.

Bihchianna

Football player hi ram pumah 20 chauh thlan chhuah an ni a, heng zinga paruk chu Mizo an ni phak. Mizoram hi mipa inelnaah champion-in player pali an thlang chhuak hi a mak lo. Hmeichhe team lamin beisei phak lo deuh mah se mimal a khel ṭha Grace H. Lalrampari leh Vanlalhriattiri Bawitlung te an tel.

Mizo basketball player zingah Zonunsanga chiah trial nei tura thlan a ni a, sub junior leh junior huanga Mizoram tana feh chhuak tawh Zonuna hi thlan zui a ni bawk. Ramthar Veng tlangval hian Mizoram Super League lamah a theihna a lantir tawh a, MSL hnuhnung berah Zarkawt BCA champion puiin tualchhungah chuan a mikhual lo.

Hockey chu player thlanchhuah tamna ber niin ram pumah player 99 ngawt thlan an ni a, heng zinga paruk chu Mizo hmeichhe player an ni. National tournament-a an chet dan enin hockey player pariat chu May thla khan trial nei tura koh an ni a, an zinga paruk an thlang - tling zinga pathum hi SAI Extension Centre, Thenzawla awm niin,a dang pathumte hi National Academy, Delhi-a awm an ni thung.

Govt. Complex naupang pathum Jeremy Lalrinnunga, Jacob Vanlaltluanga leh Zakhuma te chu weightlifting huangah an hming a lang. Khelo India-ah khan Jeremy-a'n gold lain, Jacob leh Zakhuma te pawhin silver an hlawh chuak.

Table Tennis huangah Mizo hming a mawi ṭhin a, player 56 thlanchhuah zingah Alberto LR Ruata a tel chiang a, Jeho Himnakhulhpuingheta pawh tel tura ngaih a ni, TT-ah hian India ranking sang chin chu trial tura koh an ni.

Tel lohna langsar

Infiamna huang ṭhenkhatah pumrua inthliar bik a ni ngai lo a, hei vang hian pum raw lian lo Mizo tan kawng a inhawng zau lo nia sawi ṭhin a ni. Chutihrualin tiatpui inbeihna boxing, wrestling leh judo chu Mizo tel lohna langsar a ni.

Khelo School Games-ah khan MSSC tirhin boxer pathum an feh chhuak a, mahse boxer 65 thlanchhuah zingah Mizo hming a lang lo. Judo huanga player pakhat tirh chu thlan bik 21 zingah a tel phak lo a, wrestler fehchhuak pakhat pawh mi 61 thlan zingah a tel phak lo hlauh bawk.

Mizo Infiammi Thlan chhuahte
Basketball
# Player Khua/Veng
1 Zonunsanga Ramthar
Football
# Player Khua/Veng
1 Grace H. Lalrampari Salem Veng
2 Vanlalhriattiri Bawitlung Tlungvel
3 Flavius Lalremruata Lunglei
4 Lalnunzama Chanmari
5 F. Lalnuntluanga Ngopa
6 Lalruatfela Ramthar
Hockey
# Player Khua/Veng
1 F. Ramenmawii Lunglei
2 Lalrindiki Hnahthial
3 F. Lalawmpuii Tuipui D
4 Vanlalhriatpuii Bunghmun
5 ZD Zodinpuii Bunghmun
6 Lalruatfeli Hnahthial
Table Tennis
# Player Khua/Veng
1 Alberto LR Ruata Mission Veng
Weightlifting
# Player Khua/Veng
1 Jeremy Lalrinnunga Govt. Complex
2 Jacob Vanlaltluanga Govt. Complex
________
Note : List hi SAI-in an tarchhuah aṭanga lak a ni.