Hnehna changtu Hamilton-a'n hma a hruai

Dinhmun hniam tak aṭanga bul ṭantu Lewis Hamilton chuan German Grand Prix-ah ropui takin hnehna a chang a, a elpui Sebastian Vettel erawh a tlan tluan ve theih loh avang­in Mercedes car c Hamilton hian driver champion­­ship table-ah hmahruaitu dinhmun a luah zui leh ta.

Pathianni zan khan Hocken­heim­ring-ah German GP tlan a ni a, qualifying lama a car chiang lo Hamil­ton-a'n 14-na aṭangin bul a

ṭan. Britain driver hi a dinhmun hnung viau mah se ni dang ang bawkin a buai lo, huaisen takin a hma lama driver dang 13 awm chu a um a ni.

Champion lai Hamilton hian a mal te tein a tlan pel zel a, lap 46 an tlan meuh chuan palina dinhmun a hauh der tawh. Lap 67 tlan tur awm zinga 52 an tlan laiin championship lama hmahruaitu leh pole position aṭanga bul ṭantu ni bawk Vettel a chesual hlauh. German tlangval hi tun season chhunga a chetsual vawi khatna a ni a, anmahni ramah ngei a nih avangin intlansiak a chhunzawm thei lo hi pawi a ti zual ang.

Intlansiak a zawh meh chuan Hamilton-a'n a teammate Valtteri Bottas leh Ferrari driver Kimi Raikkonen te tlan pelin hnehna a chang thei. World champion vawi li ni tawh Hamilton hian intlansiak vawi 219 a hmachhawn tlinniah beisei phak loh result a hmu a, tun season chhungin vawi li a chakna chiah niin, a elpui Vettel nen hnehna an chan zat a intluk.

Kum 33 mi Hamilton chuan, "Bul ṭanna duhawm tak a ni lo tih ka hria a, chutihrualin beiseina sang tak erawh ka nei. Beiseina nen na takin ka nawr reng a, ka duhthusam a thlen dik theih nan intlansiak tih loh chu thil dang ngaihtuah ka nei miah lo bawk," tiin a sawi.

July 27 hian Hungaroring-ah Hungarian Grand Prix an tlan leh dawn a, tun season chhunga intlansiak vawi 21 awm tur zinga 12-na chiah a ni ang.