AIFF Awards ; Sunil Chhetri a thiam ber
All India Football Federation (AIFF) chuan Pathianni zan khan kumtina an sem ṭhin chawimawina sang AIFF Awards 2017 an sem chhuak a, Sunil Chhetri chu AIFF Player of the Year-ah thlan a ni.
Emerging Player of the Year-ah Chennaiyin FC midfielder leh India international Anirudh Thapa chu thlan a ni bawk a, Woman Footballer of the Year atan Manipur nula Kamala Devi thlan a ni thung.
Chhetri a ropui
India captain Sunil Chhertri hian nikum chhung zawng khan ram tan match ruk khelin goal nga a khung a, kuminah match li khelin goal riat a khung leh der tawh bawk. Blue Tigers tan match 102 inlan tawhin goal 65 a khung a, Indian football hmel lanna a ni.
Season hman zawh takah khan Bengaluru FC chu a vawi khat nan Indian Super League a khelhpui a, league match 21-a khelhah goal 14 khung sakin 'Hero of the League'-ah thlan a ni a, inelna hrang hrangah match 30 khelin goal 22 a khung.
Kum 2011-a infiammi te chawimawina sang Arjuna Award lo dawng tawh Chhetri hian AIFF Player of the Year chawimawina hi 2007, 2011, 2013 leh 2014 te khan a lo dawng tawh a, tun hi he chawimawina a dawn vawi lina a ni.
Tu nge Anirudh?
Kum 20 mi Anirudh Thapa hi tun hnaia Indian player ṭhangduang ber pawla sawi a ni a, Indian Super League-ah Chennaiyin FC tan khelin season hmasa kha Indian football-in a hmelhriat ṭan ve tak takna chu a ni.
AIFF Elite Academy chhuak niin India Under 17, 19 leh 23-ah te a inlan kim vek a, 2017 khan senior team tana a match hmasa ber khelin Blue Tigers tan match sarih a khel ve tawh.
April 2016 khan Mizo naupang Jerry Lalrinzuala te nen French Ligue 2 club Metz-a training zuk nei zingah khan a tel a, France aṭanga an lo kir hnuin Chennaiyin a zawm zui. Season hmasaah khan Chennaiyin tan league match 16 khelin goal hnih a khung a, assist vawi khat neiin a passing accuracy chu 64.55% a ni.
Chawimawina dang
Indian hmeichhe zinga inkhelh thiam berah Kamala Devi chu thlan a ni. Manipur forward hian 2016-17 khan India rama hmeichhe league hmasa ber Indian Women's League-ah Eastern Sporting Union chu a champion pui a, he season-ah hian league match 10 khelin goal 15 ngawt a khung.
AIFF Emerging Woman Footballer of the Year-ah Elangbam Panthoi Chanu thlan a ni a, Kamala ang thoa Manipur nula niin kum 21 chauh a la ni a, Eastern Sporting Union-ah khel mekin an si ban nghak rinawm a ni.
Hetihlai hian AIFF referee ṭha berah C. R. Srikrishna chu thlan a ni a, Coimbatore lam chhuak referee hi tun hmain Indian referee ṭha berah vawi hnih thlan a lo ni tawh a, Best Grassroots Development Programme chawimawina chu Kerala FA hnenah an hlan bawk.