Bellew leh Oleksandr an incho
British boxer Tony Bellew leh Ukrainian fighter rothap Oleksandr Usyk te chuan inhmachhawn an hreh loh thu an sawi ve ve a, hun rei loteah boxing hmuhnawm en tur a awm dawn niin a lang.
Kum 31 mi Usyk hian Pathianni zing khan world cruiserweight title pali WBO, WBC, WBA leh IBF kawl vek turin Murat Gassiev a hneh a, hemi hnu lawkah hian Bellew chuan, "Usyk i tan ka inpeih e, inhmachhawn tawh ang," tiin twitter lamah a tarlang.
Vawi 15 chauh fight a la hmachhawna hnehna chang vek Oleksandr Usyk chuan Bellew-a chona hi chhangin, "Keipawh ka inpeih tawh e," a ti a, Bellew a hlau bik lo.
Kum 35 mi Bellew hian tun hnaiah heavyweight boxing khelin a hnampui David Haye chu vawi hnih ngawt a hneh a, a promoter Eddie Hearn chuan Usyk nena an in fight tur chungchangah tun kar hian inbiakna an kalpui tur thu a sawi.