Ozil a in hri thla

Germany midfielder Mesut Ozil chuan chi leh chi thliarna leh a phu ang zahna a dawn loh avangin ram tana inkhelh a chawlhsan thu official twitter kaltlangin Pathianni khan a puang.

Kum 29 mi Ozil chuan a lungawi lohna hi point pathum President Erdogan nena inhmuh, media leh sponsor bakah German Football Association (DFB) thupui hmangin chipchiar takin a ziak.

Arsenal midfielder chuan, "Kan chak chuan German ka ni a, kan chak loh chuan pem lut mai ka ni," tiin a lungawi loh thu a sawi chhuak. Ozil hi ram tan vawi 92 inlan tawhin 2014 World Cup an champion theih nana player pawimawh a ni a, kum 2011 aṭangin fan-te chuan national team player of the year atan ṭum nga ngawt an thlang.

Ozil laka German media leh mipui an hel ṭanna chu Arsenal midfielder leh amah ang bawka Turkish thlah Manchester City midfielder Ilkay Gundogan ten May thlaa Turkish president Recep Tayyip Erdogan nen London-a thil tih khawmnaa thla an lak ho vang a ni.