NBA 3-points nei hnem ber Steph Curry

“Meichher chu inhlan chhawn a ni a, player ṭhain thlamuan thlak takin a chelh," tiin Stephen Curry-a record thar a siam chungchang chu Ray Allen-a'n a sawi. Allen hian a record rawn khumtu chuan a phu hle tih a sawi bawk.

Stephen Curry chu basketball inelna sang ber NBA huanga 3-points vawm lut hnem ber a ni ta. Nimin zing khan Curry hian record lo awm hmasa Allen-a chelh lai vawi 2,973 chu a khum, tunah chuan vawi 2977 zet a nei ta.

Record thar
Golden State Warriors star hian record tluk turin vawi khat chiah 3-points neih a ngai tih hre sa chungin New York Knicks a hmachhawn, quarter hmasa berah record hi nih rualin a khum zui a, inkhel pumpuiah vawi nga a nei zui a ni.

GSW match dang ang bawkin Curry chu point nei hnem ber a ni leh, court chhungah minute 35 a inlan chhung hian point 22 neiin a team hi 105-96 in hnehna a chanpui; season kal laiah vawi 23 an chak tling ta chiah.

Point Guard Curry chuan, "Basketball ka khelh tirh aṭangin duhthusam leh tih chak tam tak ka nei, chung zinga pakhat chu ka tihlawhtling leh ta, ka tan chuan hetiang hun tawn hi a ropui. Fans lamin nasa takin min lawmpui a, ka tan chuan a hlu takzet," a ti.

Record thar a siam chiahin Curry hi a hmelah a lungawi takzet tih a lang, point a neih hnu hian anmahni lamah hnung tawlhin a awm a chum, record thar a lawm lai hian fans thawm a ṭha rem rem hle.

A ropui
Record siam turin Curry-a'n match 789 a mamawh a, a khum tak Allen-a'n 3-points vawi 2,973 nei turin match 1,300 a mamawh thung. Match 511 teh meuhin Curry hi a khel tlem zawk tihna a ni, a sulhnu hi sawi nep theih a ni lo.

Allen-a record hi kum 2011 a siam kha niin, ani hian Reggie Miller a khum ve thung. Tuna player khel lai zingah chuan Curry bakah James Harden chu record nei ṭha a ni, ani hian vawi 2509 zet 3-points a nei ve tawh bawk a, a la neih belh zel ang.

Kum 33 mi Curry chuan, "Ka naupan laiin Allen leh Miller te inkhel hi ka en ṭhin, ka mi ngaihsan leh entawnte an ni a, anni huanga ka hming a lang ve mai hi a lawmawm dan a zual, ka tana a hlut dan tur chu min chhut thiampui mai awm e.

"Malsawmna ka dawng a, ka vanneih em emna chhan pakhat chu khelhpui tur ṭha tak ka nei ṭhin hi a ni," tiin a sawi a, a hlawhtlinna chu amah chauh ni loin khelhpui a neih ṭhat vang a nih thu a sawi tel bawk.

Inkhel dang
Golden State Warriors hi match 23 an chak tawh avangin anni aia chak hnem an awm lo. Season hnih chhung beisei phak lo mah se kuminah chuan an rawn kang sang leh ta hle; Western Conference table hmahruaitu an ni chhunzawm.

Nimin zing inkhel dangah Phoenix Suns chuan Portland Trail Blazers lakah 111-107 a hnehna changin Golden State an um ve zel bawk. Season hmasa lama khel ṭha Suns hi kuminah pawh an hmuhnawm, match 22 an chak leh tawh a ni.

Inkhel inhnehtawk takah Brooklyn Nets chuan Toronto Raptors 131-129 in an hneh, hnehna chang tur hian over time an mamawh. An chak theih nan hian Kevin Durant chu thawh hlawk a ni - Nets tan hian 34 points, 13 rebounds leh 11 assists a nei.

Nets hian hripui leng vangin player chhawr theih loh pasarih an nei, an zingah hian Harden pawh a tel. Inkhelh hun ṭhenkhatah point 11 zeta hniam laite nei mah se harsa takin an chak hram a, an tan chan Durant hnathawh hi a hlu zual ngei ang.

Stephen Curry ka lawmpui che. NBA huanga 3-points record i siam hi a ropui. Basketball khelh dan phung i rawn her danglam avangin ka lawm. I nu leh pa Dell leh Sonya ten an thlawp lai che hmuh hi a nuam zual,"
- Magic Johnson

“ Dallas-ah Stephen Curry a record siam en turin ka kal. Record ropui chu a siam ta ngei e, ka unaupa ka lawmpui lutuk che," - LeBron James

“ Record khum niin, sulhnu ropui hnutchhiah a ni. Inkhelh kalphung thlak, kumtluangin," - Golden State Warriors