Chawhma dar 9:00-ah Mizoram vs Tripura

71st Senior National Basketball Championships Men & Women – North East Zone-ah Mizoram mipa team bul ṭanna tur chu Tripura a ni a, chawhma dar 9:00-ah an inkhel ang.

Mizoram tan Tripura hi hneh ngei tura beisei an ni a, chutihrualin NorthEast champion chauhin final round an khel dawn. India hmarchhakah hian Assam leh Meghalaya te hi team ṭha an ni a, Nagaland an la awm bawk.

Mizoram team captain Lalrina Renthlei-in India aiawhin Senior Team SABA Championship-ah nomawi a chawi zo chiah a, Zarkawt BCA player hi innghahna tham a tling ang.

Covid-19 vangin Mizoram Super League khelh theih ni rih lo mah se MSL hian Mizo player-te a ti ṭha hle. Chutihrualin MSL hian National Basketball Championships-a che ṭha tur khawpin nghawng a nei lian em tih chu a hriat dawn.

Mizoram coach KC Lalliantluanga chuan, “Mizoram ah nasa takin basketball a ṭhang a, Mizoram Super League kan neih zarah kan Mizo inkhel miten hnam dang mahni aia pianphunga sang leh lian zawkte an lo khelhpui ta zeuh zeuh hian hma min ti sawn lehzualin ka hria. Kan khingpuite khel kan la hmuh loh avangin kan dinhmun erawh a sawi lawk thei lo a, chak turin theihtawp kan chhuah ang," tiin a sawi.