Mizoram hmeichhe team mellung thar

Mizoram basektball hmeichhe team-in Basketball Federation of India (BFI) buatsaih inelna an la hmachhawn ngai lo a, vawiin dar 11:30 hian 71st Senior National Basketball Championships Men & Women – North East Zone-ah inelna thlengtu Meghalaya an hmachhawn dawn.

Tun ṭum hi Mizoram team-in National Championship an hmachhawn hmasak ber tur a nih avangin mellung thar a ni. Chutihrualin kum 2010 khan NorthEast inelnaaah chuan an tel tawh a, result ṭha an nei lo.

Mizoram coach Marc Lalthlamuana Sailo chuan, "Meghalaya hi keini aia ṭha tur zawk chu an ni a, chutihrualin kan naute zingah Mizoram pawna khel tawh leh Meghalaya a khel tawhte pawh an awm. An huphurh bik lo a, chak theih kan inbeisei a, chumi tur chuan theihtawp kan chhuah ang," tiin Vanglaini a hrilh.

Hmeichhe inelnaah hian team thum Mizoram, Meghalaya leh Assam te an awm a, team pakhat chiahin final round an luh dawn avangin chak loh a thiang lo.