Premier League club-ten Covid-19 hneh an tum!

Covid-19 hri leng thar Omicron vangin Premier League club-te an talbuai zel a, an talbuai zel tur ven nan English top flight league-te chuan hmalak dan tur ruahmanna thar an siam leh ta.

Tun hnaiah Omicron-in England a luhchilh ve leh a, December 6-12 inkara test nei mi 3,805 aṭangin mi 42-in Covid-19 an kai tih hmuhchhuah a ni leh tawh - Premier League-a Covid-19 test kalpui a nih hnua kai an hmuh tam ber ṭum a ni!

Hetiang a nih avang hian Premier League-in tihdam aiin inven a ṭha, tih chu thupuiah hman an duh a, English top flight league hian khauh zawka invenhimna kalpui leh turin thutlukna an siam.

Premier League club staff leh player-te chu training an neih dawn apiangin lateral flow test an nei tawh dawn a, ni tin deuhthaw chu test an kaltlangpui a ngai tawh dawn tihna a ni.

Khirh lehzualin...
Premier League player leh club staff-te hian lateral flow test ni tin an neih bakah kar khatah PCR test vawi hnih tal kalpui leh turin tih a ni bawk a, hetiang ang taka test hi kalpui a nih chuan boruak pawh zia chho leh mai tura ngaih a ni.

Season hmasaa Covid-19 vanga an talbuai khan Premier League hian tun ang deuh tho hian ruahmanna an lo kalpui tawh a, test neih tak hi dan thar an siam hma pawh hian kalpui reng mah se nipui lai khan kar khata PCR test vawi hnih an neih ṭhin chu lateral flow test hmangin an thlak.

Mahse, hri thar Omicron a hluar leh tak viauah chuan Premier League pawh an kalphung ngaiah bawk an let leh dawn a, ruahmanna thar hi a rang thei ang bera kalpui a nih tur thu sawi a ni.

Test bakah hian hmai tuamna uar lehzuala hman te, khelmuala player an inhliama enkawl pekin rei lutuk lo pe tur te, social distancing uar thar leh tur tein zirtirna inpek a ni.

A buaithlak!
Tun hnaiah Covid-19 vangin Tottenham Hotspur leh Manchester United inkhel tur chu sawn a lo ni tawh a, fixture a hautak ṭhin avangin club tam zawk chuan hri leng vanga an fixture sawn loh hram hi an duh ṭhin.

A bik takin December-ah fixture a chep lehzual a, tuna hri leng vanga khelh theih loh match ho hi hun awl remchang, a hnawh theihna tur zawn a ni leh dawn a, mahse, club tan chuan fixture a chep tawh dawn tho tho.

Hetiang a nih chuan inkhel pe chhuaktu broadcasting company lam aṭang pawhin an sum sen tur zat tih hniam theihna remchang a awm thei dawn tihna a ni a, hei hi Premier League club tam tak chuan pumpelh an duh ang.

Premier League club-te hlawkna ber chu broadcasting rights aṭanga an sum chan an hmuh ve hi a ni a, hei vang hian broadcaster aṭanga sum hmuh tur tlem theihna ang chi chu pumpelh hram dan ngaihtuah an duh dawn.

Engtin zel?
Premier League club zingah Brighton &Hove Albion, Leicester City, Aston Villa leh Norwich City te chu club player leh staff zinga Covid-19 kai nei an ni a, tun season Premier League club zinga inkhel en tur fan-te check thlap thlap chu Brighton, Chelsea leh Tottenham chiah an ni.

Mahse, UK sorkar pawhin hri darh zel tur ven nan khauh zawkin inkhuahkhirhna dan a kalpui leh tawh a, England-a infiamna thil reng reng, entu mi 10,000 aia tam an punkhawmna turah chuan an negative ngei a ni tih lanrtirna certificate nei lo chu luhtir an ni dawn lo.

Covid-19 hri danna dose hnih la tawhte chu an kal phalsak an ni dawn bawk a, anni pawh hian an certificate phawrh chhuah tur an neih ngei a ngai dawn thung a ni.

Player-te him nan therapy minute 15 aia rei lo lak te, physical treatment inpek rei lutuk lohte chu hmalakna langsar a ni a, hemi rual hian medical staff-te chu player an enkawl emaw an inhnaih reng rengin PPE hmanga inthuam zel tura tih an ni bawk.