Man City tan De Bruyne a inlar ta

Manchester City-in Thawhlehni zan khan Leeds United 7-0 zetin an sawp a, Pep Guardiola hoten Premier League nomawi humhim turin an ṭha tawk tih an pholang.

Etihad Stadium-a inkhelah Kevin de Bruyne a langsar leh ta a, Belgian midfielder hian goal hnih khungin Phil Foden, Jack Grealish, Riyad Mahrez, John Stones leh Nathan Ake ten goal khat ṭheuh an khung.

Man City-in bul an ṭan ṭha a, De Bruyne ball pass ṭha bik chu Bernardo Silva-a'n hnai tak aṭangin khung lo mah se goal dang khung turin hun an mamawh rei lo.

Minute riatna lekah Rodri goal khung tur keeper Illan Meslier-a'n dansak mah se a per chu Foden-a'n a ti goal tho. A khat mawi tawkin City-in goal an khung zui a, minute 13-naah Grealish a tauh goal.

De Bruyne chelh reng theih a ni lo a, minute 32-naah Rodri siamsak chu Belgian midielder hian a khung. Leeds an ṭang khawt thei lo, Riyad Mahrez-a'n minute 49-naah a kei vei lamin goal kilah tak a pet lut.

Leeds-in goal li an chhuah hnuah Man City tlarhnung ti buai ve deuh mah se minute 62-naah De Bruyne-a'n box pawn aṭangin kawh zetin a pet goal a, Marcelo Bielsa hote tan thawhchhuah ngaihna a awm tawh lo.

Man City defender pahnih Stones leh Ake ten an khung belh a, Pep-a hoten inkhel an thununzia a sawifiah. Spanish manager Guardiola chuan, "De Bruyne theihna kan hmu leh ta hi ka lawm. Season ṭantirh khan a harsat a, inhliam a neih bakah Covid a kai a, a harsa ve bawk a ni. Tunah erawh a khelh ṭha chhunzawm zel ka beisei," tiin a sawi.

Leeds manager Marcelo Bielsa erawh a lungawi lo. Argentine manager chuan, "Man City kha an khel ṭha a ni lo a, kan khel chhia a ni. City chuan kha chu ṭum danga an khelh ang tho a ni a, keini erawh kum li chhunga kan khelh chhiat ber a ni," tiin a sawi a, lawmna tur reng a awm loh thu a sawi tel bawk.