A hun hmain Aguero a chawl

Sergio Aguero chuan nimin khan football khelh a chawlhsan thu a puang a, Argentine striker hian a boot a khai chhan hi a lung lam ṭhat loh vang a ni.

Kum 33 mi Aguero hian nipui khan Manchester City aṭangin Barcelona a zawm a, inhliam leh hriselna ṭhat tawk loh avangin Catalan club tan match nga chauh a la inlan.

October 30 khan Alaves nen 1-1 an inhnehtawk ṭumin thawk a harsat avangin damdawi in panpui a ni a, Aguero dinhmun hi zir chian hnuah professional football khel zui thei a ni ta lo.

Nimin khan Nou Camp-ah Aguero hian a chawlh thu a puang a, Manchester City manager Pep Guardiola pawh a chhimtu zingah a tel.

Aguero chuan, "Kan inhmuh khawm chhan hi chawlh ka tum chungchang sawi turin a ni a, hun hrehawm a ni. Thutlukna harsa a ni a, hriselna vang liau liau niin thla khat leh a chanve liam taa thil thleng vang a ni. Medical staff enkawlna hnuaiah ka hriselna erawh a ṭha e," tiin a chawlh thu a puang.

Big screen-ah Aguero vul lai pho lan a ni a, Atletico kawr ha chunga goal a khung lai, Man City tana a ropui dan leh Barcelona kawr a hak thlengin an pho chhuak. Argentine striker hian a che tla hi a en lo a, a mittui a hru - a khawngaihthlak takzet.

Aguero chuan, "Ka thlen chin hi ka chhuang a, kum nga ka nih a, ball ka khawih hmasak ber aṭangin professional player nih hi ka duh. Kum 18 ka niha hun ṭha min petu Atletico Madrid leh Manchester City chungah ka lawm. Mi zawng zawngin City-in min duhsakzia an hria," tiin a club hlui te chungah lawmthu a sawi.

Manchester City pawhin social media-ah Premier League nomawi an chawi hmasak ber ṭuma Aguero goal khung lawm lai an pho chhuak a, an thuziak chu, "Aguero kan tan chuan lal i ni. Manchester City-a awm zawng zawngin kan club hlawhtlinna tura i hnathawh avangin lawmthu kan sawi. I kal zelna turah duhsakna kan hlan a che," tih a ni.

Aguero chuan, "Harsatna ka tawh tirh khan medical staff ten inkhelh tawh lohna chance a sanzia min hrilh a, a hrehawm takzet. Tunah chuan ka ṭha tawh e," tiin a sawi.

Argentine forward hian football career hlawhtling tak a hmang a, match 786 khelin goal 427 a khung. A tawp khar dan duhthusam ni ta lo mah se Aguero hlawhtlinna hi professional player tam tak duhthusam a ni ngei ang.