Coach ṭha ber Conte

Infiamna chanchinbu lar La Gazzetta dello Sport chuan kum danga an tih ṭhin angin Gazzetta Sports Awards an sem a, coach of the year atan Tottenham Hotspur coach Antonio Conte an thlang.

Conte hian season hmasa khan Inter Milan chu Serie A nomawi a chawipui a, mahse, nipui transfer-ah a chhuahsan. November khan Nuno Espirito Santo bantu Spurs a enkawl zui a, league-ah a la tlawmpui lo.

Italian coach chuan, "Inter-a ka hun tawn kha a hlimawm a, club president Zhang-a duhna angin an awmna tur tak-ah kan dah a ni. Kha leh chen Italian football thununtu Juventus kan hneh thei kha ka inchhuang hle a ni," a ti.

Conte enkawl Spurs hian zanin dar 1:00-ah league match khel turin Leicester City an mikhual dawn a, Foxes hi 4-0 a Magpies hneh hlim an nih avangin an phur vanglai tak a ni a, hmachhawn an châkawm lo.

Tottenham erawh tun hnaiah Europa Conference League-a Rennes nena an inkhel tur leh league-a Brighton & Hove Albion nena an inkhel tur chu an squad-ah Covid-19 kai an awm avangin sawn a ni a, club training ground thlengin khar a ngai hman hial a ni.