Liverpool tan chanchin lawmawm

December fixture chep karah Liverpool-in chanchin lawmawm hriat tur an nei a, hliam vanga chawl an player ṭhenkhatten training an zawm leh tawh - zanin dar 1:30 hian Newcastle United an mikhual dawn.

Liverpool tan hian hliam vanga rei tak chawl tawh Curtis Jones chuan training a zawm a, midfielder ṭhangduang bakah hian Divock Origi pawhin training a zawm leh tawh.

Goal pawimawh khung thei tak Origi hi kar hmasa khan training-naah a inhliam a, Inrinni zana 1-0 a Aston Villa an hnehna inkhelah pawh khan a inlan thei lo a ni.

Liverpool tana thu lawmawm ber erawh Roberto Firmino dam chiang tawh anga lang chu a ni a, Brazilian forward hian zaninah bul a ṭan nghal erawh a rinawm loh.

Kum 30 mi Firmino hian malpui hliam vangin match sarih ngawt a khel lo tawh a, kar hmasa Ningani khan training zawm tawh mah se 100% a dam a la nih loh avangin Villa hmachhawn team-ah pawh khan a tel lo.

Tun season-a match 11 aṭanga goal ruk leh assist vawi khat neitu forward a dam ta hi Jurgen Klopp tan chuan thu lawmawm a tling - German coach hian Diogo Jota, Mohamed Salah leh Sadio Mane te nen tlarhmaa inkawp tur duhthlan tur a nei ṭha leh ta tihna a ni.

Reds hian Pathianni zan dar 10-ah Tottenham Hotspur an lenchilh zui dawn a, player hah lutuk tur ven nan Klopp-a'n zaninah a squad a siksawi leh nualin a rinawm - Naby Keita, Kostas Tsimikas leh Ibrahima Konate te chu Magpies lakah bul an ṭan a rinawm.

Newcastle hian sum an ngah thar hnuah Steve Bruce banin Eddie Howe lalut mah se an beisei ang result an la nei thei lo a, Howe hnuaia match nga an khelhah vawi khat chiah la chakin vawi hnih draw an nei a, vawi hnih an tlawm - an match hnuhnung berah Leicester City chuan 4-0 in an sawp a, Anfield-a chak tur chuan beisei an harsa.