Gerrard-a team an chak leh ta

Liverpool laka an tlawm hnuin Aston Villa an insiamṭha nghal a, Steven Gerrard-a enkawl club hian an ban tak Dean Smith-a enkawl Norwich City chu 2-0 in an hneh.

Villa tan Jacob Ramsey leh Ollie Watkins ten goal khat ve ve an khung a, Norwich-in a chhanletna tur an neih loh avangin Villa an chak.

Gerrard leh Smith tan Thawhlehni zan inkhel hi a pawimawh lehzual. Villa-in Smith banin a aiah Gerrard an lalut a, Gerrard tan tlawm chu mualphona a ni a, Smith tan Villa chhanletna hun a ni.

Mahse, Liverpool lakah pawh ṭang rei thei tak Villa-in Gerrard-a hnuaia an hmasawnna an pholang a, inkhel an thunun hle - minute 34-naah Ramsey chuan anmahni lam aṭanga ball khalh ṭanin a khalh tlang a, mawi zetin goal hmahruai a khung.

Ramsey chuan, "Kan coach Gerrard-a inkhel lai ka thlir ṭhin a, khawvela midfielder goal khung thiam bik a ni - chutiang chiah chu nih ve ka duh a ni," tiin an coach aṭanga a inzir thu a sawi.

Gerrard chuan, "Khatiang ang taka ball khalh theih kha chu midfielder tan chuan fak mai loh chu tih tur a awm lo. Goal ropui em em a khung zui a, goal of the month atana thlan tura chhawpchhuah tur zinga mi a ni," a ti.

Villa tan hian Watkins chuan minute 87-naah a khung ve leh a, Norwich tan si phurh sut zo turin hun a awm tawh lo - Villa an chak a, Gerrard-a hnuaia match ruk an khelha vawi li an chakna a ni.

Rangers boss hlui kaih-hruaina hnuaia Villa hneh loh hi Manchester City leh Liverpool an ni a, a tawi zawnga sawi chuan Villa hian an tiahpui anga lang club chu an hneh zel - City leh Reds hneh loh hi an squad enin thil zahthlak a ni lo.

Norwich lakah pawh Villa hi goal tam zawk khung thei an ni. John McGinn-a'n box pawn aṭanga ṭha zeta a shot Norwich keeper Tim Krul-a'n a lo dan hmante chu uiawm tak a ni - Gerrard-a'n a vanglaia a lo khung tawh ṭhin ang kha a ni.

Watkins-a'n goal khat aia tam khung theihna remchang a nei bawk a, Norwich erawhin Villa an chhaih buai pha meuh lo - Villa goalkeeper Emiliano Martinez thlan a tla tam vak lo ang!

Hetihrual hian Norwich hian hliam vangin club captain Grant Hanley, Milot Rashica leh Mathias Normann an chhawr thei lo tih hriat telsak a ṭha - Ozan Kabak chu hliam vangin lakchhuah a ni ve leh bawk.

Norwich hian Inrinni zan dar 8:30-ah West Ham an lenchilh zui dawn a, coach Dean Smith chuan Hammers hmachhawn tur player a neih daih dawn leh dawn loh a hriat loh thu a sawi!

Canaries hi Covid-19 vangin an buai tel bawk a, Smith chuan, "Spurs leh United kan hmachhawn zawh hnuah hri leng vangin an squad a buai ve ve a, ka player zingah khan hri kai lo awm ta se, Villa tan a fair lo mai thei," a ti!

Smith chuan, "Ozan Kabak a inhliam a, Sam Byram lah kum hnih hnua a vawi khat nan a inlan ve chauh a, tunah chuan duhthlan tur kan nei tlem ta hle. Darkar 48 hnuah kan medical staff-te aṭangin kan dinhmun chiang tak ka hre chauh ang," a ti a, hri leng chuan football chauh ni loa ram pumpui thlenga a tihbuai thu a sawi bawk.