Hnehna nena bul ṭantu Sindhu

PV Sindhu chuan BWF World Championship khelh laia a match hmasa berah hnehna a chang. Indian star hian Thawhlehni khan second round khelin, a khingpui Martina Repiska chu 21-7, 21-9 in a hneh.

World number 7 Sindhu hian hnehna chang turin minute 24 chauh a mamawh, a khingpui Slovakian nula lakah hian a tir aṭanga a tawp thlengin harsatna a tawk lo - a match lehpekah chuan Lu Guang Zu leh Chou Tien Chen te inkhela chak zawk a hmachhawn leh ang.

Olympic medal vawi hnih la tawh Sindhu-i'n 2019 khan BWF World Championship title hi a la, a hnu lamah tun ṭum hi inelna an neih leh vawi khatna chauh a ni, nomawi kawl lai a nih avangin a lakah beiseina pawh a sang.

Indian player dang Satwiksairaj Rankireddy leh Chirag Shetty te chu mipa doubles huangah an inlan a, an khingpui Chinese Taipei mi Lee Jhe-Huei leh Yang Po-Hsuan te chu minute 43 chhungin 27-25, 21-17 in an hneh.

Mixed doubles pair Saurabh Sharma leh Anoushka Parikh te erawh an chak lo. An match hmasa berah Tan Kian Meng leh Lai Pei Jing te an hmachhawn a, game an la miah lo; 21-8, 21-18 in an tlawm.

Mipa singles lamah Olympic champion lai Viktor Axelsen chu a match hmasa berah a lo tlawm tawh. Denmark tlangval hi a khingpui Loh Kean Yew lakah 21-14, 9-21, 6-21 in a chak lo nghal a ni.

Axelsen chuan, "Game hmasa ber kha chu ka khel ṭha, a hnuhnung pahnihah kha chuan ka che thei thlawt lo a ni ber mai. Loh-a'n nasa taka hma a sawn laiin kei ka hnungtawlh thung, thawhchhuah a harsa tawh a ni," tiin a sawi.

Champion tura rinkai Axelsen a tla a, inelna neih ṭan hmain Kento Momota a inhnukdawk fel tawh bawk - tunah chuan tu ber nge mipa singles champion ni ang tih rin thiam a harsa ta hle.