Thiem inkhel thei dawn rih lo

Dominic Thiem chu beisei aiin a chawlh rei a ngai dawn. December 16-18 chhunga khelh tur Mubadala World Tennis Championship-ah inlan tum mah se a hliam a la dam fel lo a, a inhnukdawk leh hnuhnawh.

Kumin June thlaa khelh Mallorca Open-ah Thiem hi a inhliam, a hnu lamah a la inkhel leh miah lo. US Open nomawi a kawl lai pawh a humhim thei lo, world ranking lamah pawh 15-naah a tlahniam tawh a ni.

Austrian tlangval Thiem chuan, "Abu Dhabi-ah inkhel tura kal ngei kha ka tum, amaherawhchu ka taksa hi inkhel turin 100%-in a la inpeih lo. A ṭha thei ang bera ka inkhelh theih hma chu dawhthei taka nghah rih ka ngai," tiin a sawi a, a lo kir hun turah a hmanhmawh duh lo.

Kum 28 mi Thiem hi theihna nei sang bik zinga mi a ni. Mahse, player ropui dangte kara chawr chhuak a nih avangin nomawi lian tham a chawi tam tawk lo, a vanglai a hman dawn lai taka hliam na tak a tuar hi atan chanchin lawmawm lo bik a ni ang.

Mubadala World Tennis Championship khelh turah hian US Open champion lai Emma Raducanu pawh a lo inhnukdawk tawh. British tleirawl hi hripui leng a kai avangin khunghran a ni a, a inkhel thei rih lo.