Max hian nomawi dang a la chawi leh ang - Marko

Red Bull motorsport adviser Helmut Marko chuan Max Verstappen lakah beisei a nei sang a, an driver hian Formula 1 title hi tun ṭumah chauh ni loin hun lo kal zel turah pawh a lak belh ngei a beisei thu a sawi chhuak.

Dutch tlangval Verstappen hian Lewis Hamilton hnehin F1 champion a ni. Car intlansiakna sang bera a champion dan hian sawi a hlawh, intlansiak hnuhnung berah pawh lap hnuhnung berah Mercedes car tlan pelin hnehna a chang a ni.

Marko chuan, "A theihna ka hre chiang, tun hi a tawpna a ni lo ang. A nihna takah chuan intlansiak kan hmachhawn hnuhnung pahnihah khan, kan team car in a tih theih aia chakin a khalh hial. Max Verstappen hian F1 nomawi tam zawk a la leh ang," tiin beiseina a nei sang hle.

Season tluan thlir chuan Verstappen hi champion phu ber a ni, a chak hnem ber. Mahse, inelna hnuhnung lamah champion lai Hamilton a che ṭha a, a hnuhnung ber thlengin an point a inzat - a tawpah erawh Red Bull driver zawk a chungnung.

Kum 2015 khan Verstappen-a'n F1 season pangngai a hmang ṭan a, kum 17 a pum hma ni nga chauh la awmah inelna hmachhawnin, car intlansiakna sang bera season pangngai hmang thei naupang ber a ni - tunah kum 24 mi niin a champion fel der tawh a ni.