Muller nih rualtu Lewandowski

Robert Lewandowski-a'n record dinglai hrang hrang tlukin a khum chho zel a, tunah pawh kum khat chhunga Bun-desliga goal khung hnem Gerd Muller-a record (42 goals) chu a nih rual leh ta.

Thawhlehni zan Bundesliga inkhelah Bayern Munich hian VfB Stuttgart chu 5-0 in an luhchhuah. Striker Lewy-a'n goal hnih a khung, kum 2021 chhungin Bundesliga goal 42 a khung ta a, record lo siam hmasa tawhtu Muller a nihru-al bakah a khum ngei a rinawm.

Bavarians tan Serge Gnabry-a'n hattrick a siam a, Germany international Gnabry hi khel ṭhain che ropui viau mah se goal hnih khungtu zawk Lewy-a'n record a nihrual miau avangin sawi zui a hlawh ta zawk.

German champion hian thlasik chawlh an hman hmain match khat chauh khelh tur an nei tawh. Zirtawpniah Wolfs-burg an mikhual dawn. An inkhelhna tur hi Allianz Arena a nih avangin Lewy hi goal khung leh ngei tura beisei a ni.

Julian Nagelsmann-a enkawl Bayern hian tun season Bundesliga match 16 an khelh aṭangin point 40 an hmu a, anmahni aia match khata khel tlem zawk Borussia Dortmund lakah point kuain hma an hruai fal mek.

Dortmund hian nizan khan table mawngphah luahtu Furth an hmachhawn a, an inkar hi an sawr zim ṭhen leh ngei chu a rinawm. Chutih rualin Bayern hian kuminah chuan hma an hruai tlang dawn tih a chiang tawh.