Jamshedpur chakna Stewart hattrick

Rangers aṭanga Jamshed-pur zawmtu Greg Stewart chuan Indian football-ah inthlahrun a tum lo tih a pholang leh ta a, Thawhlehni zan khan Odisha lakah hattrick a siam - Jamshedpur hian 4-0 in Odisha an hneh.

Kum 31 mi Stewart hian minute lina lek aṭangin goal a khung ṭan a, minute 35 a thlen meuh chuan hattrick a siam fel der tawh - a goal khung hma hian Peter Hartley chuan goal khat a khung ve bawk a, Odisha lamin a chhanletna tur an nei thei lo.

Scottish Premiership-a a career hun tam zawk hmangtu Stewart hian Championship lamah Birmingham City tan pawh a lo khel tawh a, season hmasa lawk khan Steven Gerrard enkawlna hnuaiah Rangers tan a la khel.

ISL-a a season hmasa bera match ruk aṭanga goal li khung a, assist vawi li neitu Stewart-a'n JFC a chakpui avangin table-ah pahnihna an ni a, Odisha erawh a vawi hnih nan an tlawm a, mahse, point hnih lekin JFC an thlau a, match khatin an khel tlem bawk tih erawh hriat a ṭha.

Odisha tan Lalruatthara, Paul Ramfangzauva, Isaac Vanmalsawma leh Jerry Mawihmingthanga ten inkhel bul an ṭan a, bench aṭangin Lalhrezuala Sailung chu luhtir a ni bawk.

Jamshedpur tan Laldin-liana Renthlei leh Ricky Lallawmawma ten minute 90 an khel tluan bawk a, Mizo defender ṭha pahnih hian an khel ṭha dun hle.