Kan tum chu nomawi chawi - Klopp

Liverpool manager Jurgen Klopp chuan an club ke pen lehna tur chu 'nomawi chawi' a nih thu a sawi a, hetihrual hian engmah a tiam theih loh thu a sawi bawk.

Liverpool hian tun hnai thla 12 chhungin player manah pound maktaduai 250 vel an seng tawh a, mahse kum 2012-a League Cup an champion kha nomawi an chawi hnuhnung ber a ni tawh.

Klopp chuan, "A sang thei ang ber thlen hi 100%-a kan tum chian chu a ni. Mipuiin kan chunga beiseina an neih pawh ka hrethiam a, hei chu thil nihphung ve reng a ni," tiin champion tura beisei an ni chu thil awm tak a nih thu a sawi.

Hmanah chuan...
Liverpool ropui hunlai sawi dawn apiangin, "Hmanah chuan..." tia bul ṭan a ngai ṭhin a, hei hi Jurgen Klopp hoin thlak danglam an tum mek. League-a an champion hnuhnung ber chu 1990 kha a ni tawh a, European champion an nih hnuhnung ber lah 2005 a ni.

Mahse, October 2015-a Klopp awm hnuin League Cup, Europa League leh Champions League final an khel leh tawh vek a, tun hma ai chuan nomawi an hnaih leh tawh tihah phat tur a awm lo.

Klopp chuan, "Mipui chuan nomawi chungchang hi an sawi reng dawn a, a awm lo hran lo. Pen khat lek pen belha kan neih theih chu nomawi hi a ni a, chumi tur chuan kan inbuatsaih a ni," a ti.

Liverpool leh bazar
Merseyside club hian January khan pound maktaduai 142-in Philippe Coutinho chu Barcelona hnenah an kaltir a, mahse Brazil playmaker an chan hnuah Liverpool hian bazar-ah sum an ren lo hle.

January khan khawvela defender manto ber ni turin Virgil van Dijk chu pound maktaduai 75-in an lalut a, Alisson chu khawvela goalkeeper manto ber ni turin pound maktaduai 66.8-in an lalut leh tawh bawk.

Nikum lama inremna an lo neihpui tawh, pound maktaduai 50 man midfielder Naby Keita chuan Reds hi a zawm tawh a, Monaco aṭangin Fabinho chu pound maktaduai 40 chuangin an lalut a, Switzerland winger Xherdan Shaqiri chu Stoke City aṭangin pound maktaduai 13-in an lalut tawh bawk–fan ten beiseina an nei sang hi thil awm lo a ni lo.

Hmasawnna
Liverpool hian season hman zawh takah khan Champions League final an lut a, Premier League-ah palina an ni bawk. Klopp hnuaiah season thum an khar tawh a, Premier League-ah palina aia sang an la luah lo.

Klopp chuan, "Season hmasa kan thlen chin aṭang khan hma kan sawn theih ka beisei. Kan football khelh dan kha en let ula, rim taka kan thawh hnua khatianga khel chhuak thei kan nih avang khan a awlsam lo a ni.

"Kuminah pawh nikum ang bawkin kan thawhrim chhunzawm ang a, ṭha takin kan khel chhuak leh thei ang tih thuah hian rinhlelh tur a awm lo," tiin a naute a ringtawk hle.

Club dang pawh...
Liverpool-in tun nipui transfer-ah ringawt player pali an nei tawh a, Shaqiri tih loh chu pound maktaduai 40 chuang man vek an ni–an neihsa nena thlir phei chuan Liverpool an ṭhat belh dawn tih a chiang.

Mahse, Klopp chuan Reds chiah hmasawn tur an nih loh thu sawiin, "Club dang pawhin transfer an ti ve zel dawn tho a, season hmasa aia an hniamna chhan tur a awm lo," a ti a, Premier League-ah inelna a san a beisei.

German coach chuan Manchester City sawilangin, "Riyad Mahrez an neih belh a, ka hriatchinah an player an la hralh miah lo bawk. An squad neih chhah saah Mahrez a awm belh dawn tihna a ni a, an ṭha dawn a ni," tiin Manchester khaw club a beisei sang.