Federer-a'n Rogers Cup khel dawn lo

Roger Federer chuan August thlaa khelh tur Rogers Cup-ah inlan a tum thu sawi tawh mah se, Swiss star hian hun rei zawk a inkhelh theihna tur ngaihtuahin Toronto-ah hian inlan lo turin thutlukna a siam leh hnuhnawh.

Kum 36 mi Federer hian season hmasa aṭang tawh khan inelna zawng zawng a hmachhawn duh lo tawh a, season kal laiah pawh tournament pasarih chiah a la hmachhawn. January thla khan Grand Slam 20-na ni turin Australian Open nomawi a chawi a, Rotterdam leh Stuttgart-ah te hlawhtlinna a chang tawh bawk.

Wimbledon khelh ṭhat duh vangin Federer-a'n clay court season a hmang duh lo, mahse grass court inelna lianah hian Kevin Anderson hneh loin quarterfinal-ah a tla. Tun season chhungin Indian Wells leh Halle Open-ah te a chak loh tawh bawk avangin a tan kum duhawm tak tia sawi tur a ni rih lo.

Season hmasa finalist Federer chuan, "Hun rei zawk inkhelh ka duh a, hei vang hian ruahmanna siam lawk tawh ni mah se Toronto-ah chuan ka inlan thei lo ang," tiin a sawi a, September thla a khelh tur US Open atan thahrui khek chhoh a duh vang nia ngaih a ni.

ATP World Tour Masters 1000 zinga pakhat Rogers Cup hi August 4 aṭangin khelh a ni dawn a, player langsar an fuan khawm ang. World number 1 Rafael Nadal leh Wimbledon champion Novak Djokovic te chu nomawi chawi thei tura ngaih an ni. Anni pahnih bakah hian ranking-a sang 10 zinga player pakua an tel thei dawn bawk.