Ronaldo hian UCL-ah danglamna a thlen ang - Pirlo
Cristiano Ronaldo-a'n Juventus a pan hnuah fans lamin beiseina an nei sang nghal a, club legend Andrea Pirlo chuan Portugal captain-in Champions League-ah danglamna a thlen theih a rin thu a sawi.
Italian club ṭha hian 1996 khan Rome khawpuiah Ajax hnehin UCL nomawi an chawi a, Turin-ah Serie A nomawi hawn nawn fo mah se UCL title erawh Marcello Lippi hnu lamah an la champion leh lo.
Massimiliano Allegri naute hian league nomawi a zawnin vawi sarih ngawt an chawi thei a, European club liante inelna lamah erawh an beiseina a thamral ṭhin. Tun hnaia final an khelhah Barcelona leh Real Madrid te an ngam lo.
Italy international hlui Pirlo chuan, "Cristiano Ronaldo hian Juventus tan thil danglam bik a rawn keng ang. Player ṭha tak maiin club ropui Juve a zawm thei hi a lawmawm, ani neih chuan Champions League nomawi a chiang tihna ni lo mah se kawng khat chuan a hnai sawt a ni. Ronaldo hi chu player insiamrem zung zung thei mi a nih avangin hlawhtling takin a khelh thei ka beisei," tiin a sawi.
Kum 33 mi Ronaldo hian Manchester United leh Real Madrid te chu league leh Champions League nomawi a chawipui ve ve tawh a, a thlen chin apiangah hlawhtlinna liantham a chan zel avangin a kum tam deuh tawh mah se Juve tan beiseina thar siamsak thei tur a la ni.