Ozil leh buaina German Football Association an insawifiah

July 22 khan Mesut Ozil chuan Germany tana inkhelh a chawlhsan thu a puang a, German Football Association (DFB) hotu lian chu na taka sawiselin chi leh chi inthliarna leh a phu ang zahna a dawng lo chu a chawlh chhan niin a tarlang.

Nimin khan Ozil-a thuchhuah chungchangah DFB an insawifiah ve nghal a, Germany tana a hnahthawh zawng zawngah lawmthu an hrilh.

DFB insawifiahna chu

Lawmthu an hrilh: Ozil hian Germany tan vawi 92 a khel a, khelmual pawn leh chhungah anni ho hian hlawhtlinna kan chang. Brazil-a FIFA World Cup kan chawi theihna tura player pawimawh ber zinga mi a ni a, DFB chuan Germany kawr haa a hlawhtlinaah kan lawm kumkhua tawh ang.

Hnam hrang hrang awmkhawm hi chakna : Football chauh ni loin eng thilah pawh hnam hrang hranga inlungrual taka awm khawm hi chakna a ni. League hniam ber aṭanga national team thlengin footballer pem lut hi DFB tan an pawimawh hle. Sakhuanna leh kan chawr chhuahna chu eng pawh ni se kan inkhel ho a, kan cheng ho a. Khelmual pawn leh chhunga kan thawhhona hi a pawimawh a, dan hnuaiah zalenna kan nei a, Germany tana football khel zawng zawng kan inzah tawh hi a pawimawh a ni.

Ozil an chhan tawk lo : Turkish president Erdogan nena thlalak dun aṭanga boruak ṭha lo a irh chhuak a, German mipuiin zawhna tam tak an nei nghal. DFB chuan Ozil-a hum theihna turah a beisei angin kan hum tawk lo hi pawi kan ti a, Jerome Boateng ang lo takin chi leh chi inthliarna chungchanga a thlirna a dang bawk. World Cup-a thlen dan chu eng pawh ni se Ilkay Gundogan nen Ozil hian thlalak chungchanga zawhna hi an chhan theih a ṭul. DFB chungchangah erawh kan chak. DFB hnuaiah chuan team angin kan chak a, kan chak loh pawhin team ang tho a ni.

Ozil-a thutlukna an zah sak : Mesut Ozil hi team-ah hian tel se kan duh a, a duh thlanna erawh a dang ta si. DFB chuan a thutlukna an zah sak a, association kan nih angin kan hnuaia khel player hi kan zah a, kan chungchang a sawina hi mipui hmaa chhanlet a rem lo.

DFB a kal zel dawn : DFB hian chi leh chi inthliarna hi engtik lai mahin a duh ngai lo a, kan ambassador, staff member, kan club leh grassroots level-a volunteer mi maktaduai chuang chunga thleng atan kan phal lo. Hnam hrang hrang inlungrual taka thawhho hi kan duh. Mesut Ozil-a'n ram tana inkhelh a chawlhsan hi pawi ka ti a, amaherawhchu football kaltlanga inlungrualna kan neih theihna tura kan hnathawh erawh kan kalpui zel ang.