Premier League club 20 leh record transfer

Premier League club-ten sum an hmang hnem a, league ang zawng chuan khawvela sum hmang hnem ber ni mah se English club lakluh zinga manto ber Paul Pogba chu khawvel player manto zingah palina a ni pha chauh.

Pep Guardiola enkawl Manchester City chu sum hmang hnem ber zinga mi anni nachungin an player manto ber Riyad Mahrez erawh pound maktaduai 60 a ni pha chauh a, Algerian winger aia manto hi 17 zet an la awm.

Premier League club 20-te player lakluh zinga manto ber record chelhtute chu

Arsenal : Gunners-in kumin January thla khan Pierre-Emerick Aubameyang chu Borussia Dortmund aṭangin pound maktaduai 56-in an la lut a, thla ruk chhung lekin record ṭum hnih an siam.

Gabon striker Aubameyang hma hian London club hian Alexandre Lacazette chu pound maktaduai 45 in an lalut a, Arsene Wenger-a'n a hun tawp lamah sum a hmang hnem tiin a sawi theih bawk.

Bournemouth : Cherries hian loan hmangin Nathan Ake an chhawr a, Dutch defender hi Vitality Stadium-ah a chet ṭhat avangin season liam ta ṭan hma khan pound maktaduai 20 in an lalut. Ake hi Bournemouth tan match 38 ah a inlan vek a, Dutch national team-ah rinrawl a ni chho bawk.

Brighton : Brighton & Hove Albion hian nikum August thla khan Colombian winger Jose Izquierdo (£13.5m) lalutin record an siam. January thla khan Jurgen Locadia chu PSV aṭangin pound maktaduai 14 in an lalut a, club record thar an siam lehnghal.

Locadia hian Seagulls tana match hmasa bera Coventry nen FA Cup-a an inkhelh ṭumin goal a khung nghal a, Premier League-ah Swansea nen khung leh mah se goal dang khung belh tawh loin season a khar.

Burnley : Burnley player manto ber chu New Zealand international Chris Wood a ni teh daih a, ani hi Ashley Barnes nen tlarhmaah an inkawp fuh hle. Kum 26 mi Wood hian match 24-ah goal 10 a khung.

Cardiff : Premier League kai thar Cardiff hian English league sang ber an khelh hmasak zawk 2013-14 season khan Gary Medel chu pound maktaduai 11-in a la. Welsh club hi table mawngphahah an awm a, Chilean defender Medel hi Inter Milan-ah pound maktaduai khat chanin an hralh.

Chelsea : Blues-in Diego Costa chhuahtirin club record ni turin pound maktaduai 60-in Alvaro Morata an lalut a, Spanish forward hi Stamdord Brigdge-ah a chet ṭhat loh avangin World Cup squad-ah pawh koh a ni lo.

Crystal Palace : Palace-in kum 2016 khan pound maktaduai 27-in Liverpool aṭangin Cristian Benteke an lalut. Belgian striker hian Reds hi league goal kua chiah a khung sak a, Selhurst Park-ah goal 15 khungin season ṭan mah se season liam ta khan match 30-ah goal thum chauh a khung.

Everton : Season liam ta khan Ronald Koeman chuan pound maktaduai 145 sengin team thar din a tum a, chung zingah chuan pound maktaduai 45 man Gylfi Sigurdsson pawh a tel. Icelandic midfielder hian league-ah goal li a khung a, beisei angin bul ṭan ṭha lo mah se season tawpah erawh Toffees hi pariatna a nih pui ta tho. Everton hian Watford aṭangin Richarlison an lalut hnai a, Brazilian winger hi club record ni thei hial tura sawi a ni.

Fulham : Playoff hmanga Premier League in pettling Fulham-in tlarhnung tih chak nan Ligue 1 club Nice aṭangin Jean Michael Seri chu pound maktaduai 27 sengin an lalut. Kum 27 mi defender hi Ivory Coast tana vawi 18 kehl tawh a ni a, Nice tana season thum a khelh chhungin match 30 a khel tling vek.

Huddersfield : Huddersfield-in January thla khan loan hmangin Monaco aṭangin Terence Kongolo an lalut a, Dutch defender hian league match 13 a khel a. John Smith’s Stadium-a awm nghet turin pound maktaduai 17.5 in an lalut a, Huddersfield club record a ni.

Leicester City : Claudio Ranieri-a'n Premier League nomawi humhim turin kum 2016 khan Premeira Liga-a goal 27 khung thei Islam Slimani chu pound maktaduai 29-in an lalut. Algerian forward in beisei a pha lo a, Foxes manager Claude Puel-a'n season ṭan hmaa chhuahtir loh pawhin hmun pawimawh a chan phak a rinawm loh.

Liverpool : Reds-in tlarhnung thuam chak nan Virgil van Dijk chu pound maktaduai 75-in January thla khan an lalut a, Jurgen Klopp-a hoten Champions League final an thlen theihna kawngah Dutch defender hi a pawimawh a, tun season-ah league lamah fiahin a awm dawn.

Manchester City : Pep Guardiola-a'n season khatnaah nomawi a chawi lo a, season hnihnaah tlarhnung thuam ṭhain point hmu hnem record siam chungin Premier League nomawi an chawi. Spanish manager-in nikum nipui leh kumin January thlaa lakluh a tum tawh Riyad Mahrez chu club record fee-in a lalut thei ta a, City goal nawr a na sawt ang.

Manchester United : Jose Mourinho-a'n Manchester United aṭanga inzir chhuak Paul Pogba chu pound maktaduai 89-in an la lut a, French midfielder hian beisei angin Old Trafford-ah che ṭha tawk lo mah se tunlai pawisa hlutna thlir chuan United-in an lalut fuh hle. FIFA World Cup-ah France a champion pui leh bawk avangin Pogba hlutna a sang leh sawt ang.

Newcastle United : Magpies club record transfer hi kum 2006-a Real Madrid aṭanga an lakluh Michael Owen a la ni reng. Liverpool leh Manchester United striker hlui hi inhliam vangin St James-ah beisei a pha lo.

Southampton : Saints hian goal khungah harsatna an nei a, season hnuhnung pahnihah goal 78 chiah an khung. January thla khan Monaco aṭangin Guido Carrillo chu pound maktaduai 19-in an lalut a, Argentine striker hi club record ni mah se Southampton hi goal a khung sak lo. Season tharah hian loan-in Spanish club Leganes-ah a kal ang.

Tottenham : Spurs-in Roberto Soldado, Erik Lamela leh Moussa Sissoko te lalut turin sum ṭhahnem tak seng mah se an tifuh tawk lo. Amaherawhchu nikuma an lakluh Davinson Sanchez erawh pound maktaduai 42 zet ni mah se an la fuh hle. Colombian defender hi Jan Vertonghen nen inkawpin Premier League-a inkawp fuh ber zinga mi a ni.

Watford : Andre Gray chuan Burnley-a a contract neih lai pawhsei duh loin season liam ta khan Watford-in club record transfer (£18.5m) in an lalut. Gray hian Hornets tan hian league-ah goal nga chauh khung mah se kum ruk liam taa Conference North club Hinckley Town tana khel ve mai kha a ni a, Burnley-in club record-a an lakluh bawk avangin a thlen chin hi a sang hle.

West Ham : London club-in tun season-ah player pasarih zet an lalut tawh a, club record transfer pawh vawi hnih an siam tawh. Toulose aṭangin Issa Diop chu pound maktaduai 22-in an lalut a, hemi hnu hian Manchester United nen pawh an sawi zawm ṭhin Felipe Anderson chu pound maktaduai 33.5 in an lalut. West Ham hi an sum hman dan thlirin season tharah European competition khelh ngei an tum tih a chiang.

Wolverhampton : Wolves-in kum 2017 khan Portuguese rawlthar duhawm Ruben Neves chu Porto aṭangin pound maktaduai 16 in an lalut. Neves anga theihna sang tan Championship chu a hniam hret niin a lang a, Wolves chu Championship-ah nomawi chawi puiin kum ruk hnuah Premier League kai puiin Portugal international hi Player leh Young player of the year an thlang. Neves hi kum 21 mi a ni tawh a, kum 18 mi lek a nihin Champions League-ah Porto tan captain armband a hreng.