Aston Villa manager tur Henry?

Arsenal striker hlui Thierry Henry-a'n hun puma team enkawl hna thawh a duh avangin Sky Sports tana a hna thawh a ban san a, tuna a thu thar neih lian leh hmasa chu Aston Villa manager a ni dawn tih hi a ni. Khawthlang media-te chuan Villa leh Henry hian a thuphung chuan inremna an siam tawh niin an tarlang nasa hle.

Kum 40 mi Henry leh Villa chungchang ziaktu zinga langsar chu Daily Star niin, anni hi Henry hmelhriat hnaivai awmna an nih avangin Villa nen hian an inrem fel tawh a nih pawhin a mak lo ang. Championship club hi a enkawl a nih chuan manager puitling a nih hnua a club hmasa ber a ni dawn.

Henry a inpeih

French international hlui Henry hian inkhelh a chawlhsan hnuah coaching a luhchilh a, TV pundit hna a thawk tel bawk. Arsene Wenger-a'n TV lam hna a kal san loh chuan Gunners naupang rual enkawl pumhlumtu nih a phal lo a, hemi hnuah Belgium team manager Roberto Martinez thachhang dawltuah a ṭang.

Belgium team-ah hian kum hnih hna a thawh chhungin a thawk ṭha hlea sawi a ni, a bik takin striker Romelu Lukaku chuan, "Goal khung kawngah nasa takin min pui," tiin a lo sawi tawh. Hei vang hian attacking football khel duh club tan chuan a duhawm hle thei ang.

World Cup-ah khan Martinez le Henry ten Belgium chu pathumna an nih pui a, semifinal-ah France hneh lo mah se an thlen chin hi Belgium ram record thar a nih avangin a chhe hran lo. Russia aṭanga an haw hnuah Henry chuan, "Kum hnih chhungin manager ni turin tawnhriat ka nei hnem hman," tiin team enkawl tura a inpeih thu a lo sawi tawh a ni.

France tan match 123 a khelh

aṭanga goal 51 khungtu Henry hian Arsenal tan pawh goal 228 khungin club record chelh mektu a ni a, Gunners leh Barcelona tan league nomawi a chawi thei bawk. Player a nih lai chuan khelmual chhung leh pawnah tawnhriat a nei hnem tawk a, team enkawl kawngah erawh a fawng vuantu tak a la ni ngai lem lo.

Villa an rawn lang

Premier League club ni reng tawh ṭhin Aston Villa hi season hmasa khan Championship-ah an inlan a, Chelsea defender hlui John Terry-a captain-na hnuaiah playoff khel mah se English club inelna sang ber khel turin an inpet tling zo lo - tun season chu an sukna ngaiah an su dawn a, hei vang hian danglamna thlen thei an duh.

Chinese sumdawng hausa Xia Jiantong-a'n 14 June 2016 khan Villa hi a lei a, a rang thei ang berin EPL-ah kir tum mah se an tum a hlawhtling nghal lo; sum chungchangah harsatna an nei nia sawi a ni. Kar hmasa khan Egyptian billionaire Nassef Sawiris leh American billionaire Wes Edens te chuan club neitu nihna 55% an chang thar a, anni pahnih hian Henry hi an team enkawl turin an duh.

Hetihlai hian Edens leh Sawiris te hian Villa manager ni lai Steve Bruce chu tun kar chhungin inbiakna an neihpui leh phawt dawn a, he hunah hian Bruce-a'n Villa Park a chhuahsan dan tur an sawi dawn nia ngaih a ni.

Kum 57 mi Bruce chuan, "Kar hnih liam ta khan ka awm dan tur chu a chiang tawh. Ka hmuh dan chuan he club hian min mamawh a, mahse ka chungah eng pawh thleng se la mak ka ti tawh lo ang," tiin a sawi. English manager hian season hnih chhung Villa hi a enkawl tawh a, match 89 a hmachhawn puiah vawi 42 chak mah se ṭum 28 an tlawm a, vawi 19 dang chu an khingpuite nen an inhnehtawk.