Thla 14 atan Lochte hrem

Olympic medal 12 zet dawng tawh Ryan Lochte chuan damdawi hman dan tur dik loin a hmang lai social media-ah a tarlang a, hei vang hian US Anti-Doping Agency (USADA) chuan thla 14 chhung atan an hrem.

American tui hleuh chak Lochte hian drip hmanga 'IVs' a la lai a tarlang a, he damdawi hi damdawi in chhungah leh doctor-in la tura a tih bik lo tan chuan mahni duh thua lo lak ve ngawt theih a ni lo.

Kum 33 mi Lochte hian Oympic-ah gold chauh pawh paruk a la tawh a, legend Michael Phelps tih lohah chuan American swimmer zinga hlawhtling langsar a ni. Mahse, tun hma pawhin dan bawhchhiat vangin thla 10 chhung hrem a tawk tawh.

Tun hmain Manchester City player hlui Samir Nasri pawh drip treatment chungchangah hian buai­na a lo nei tawh a, French midfielder hi thla ruk lai hrem a lo ni tawh.