Palinaah Arsenal inkap kai

Arsenal chu Premier League-ah palina an ni mek - season tir match hmasa pathuma chak lo vek Gunners tan chuan tuna an awmna hi a mak zawk hial. Mikel Arteta naute hian Champions League rim an hre leh ṭan ta.

Nilaini zan inkhelah Gunners hian Gabriel Martinelli leh Emile Smith Rowe te goal hmangin an mikhual West Ham 2-0 in an hneh. Inkhelh hmaa palina Hammers hi nek chhuakin North London club hi a sang zual pali zingah an inhlangkai ve leh ta a ni.

Laipui a puak
Captain aṭangin Pierre-Emerick Aubameyang an paih fel a, a tukah match an khel nghal. Arteta-a'n tlarhmaah Alexandre Lacazette maltlat tirin, mual sir aṭangin Bukayo Saka leh Martinelli ten an thlawp - bench lamah Smith Rowe a awm thei tawh bawk.

Emirates Stadium-a inkhelah a tir aṭangin Arsenal chu team ṭha leh chungnung zawk an ni. Kieran Tierney-a'n bar a hlap per dawp hnuah striker Lacazette chuan defender pahnih inkarah ball a lir lut a, forward Martinelli-a'n rang zeta la fuhin Lukasz Fabianski dan phak lohin a khung.

Brazil international Martinelli hian a hnuah Lacazette tan a siamsak ve thung a, mahse defender Vladimir Coufal-a'n a lo ti tlu; yellow card pahnihna pek a nih bakah penalty a chawi bawk. Amaherawhchu, penalty hi a hlawh chhuaktuin a hlah.

Hun tawp dawn lamah Martin Odegaard la chhuakin hliam damkawr Smith Rowe dah luh a ni. English midfielder hian a dam chiang tawh tih fiah nan box pawn aṭangin an goal hnihna a khung, a siamsaktu Saka sawi hmaih theih a ni lo bawk.

UCL rim a nuam
Palina an nih dan hi a la nghet lo, Arsenal hi an hnuaia awm Manchester United leh Tottenham te chuan an khelh zat an khelha an chak a nih chuan an la tlanpel leh nghal thei, thlamuang taka awm thei chu an la ni miah lo.

Mahse, khelh hmabakah United leh Spurs hi an chak ngei ngei dawn tih a chiang bik chuang lo. Chuvangin mahni thlen chinah a sang thei ang bera awm hi eng club tan pawh a hlu a, palina ni phak tur erawh chuan hmabak a la tam dawn hle.

Arteta-a'n Southampton hnehtu player 11 bawk kha bul a ṭantir leh a, mual dinglam sira awm Saka-a'n goal khung lo mah se an goal nawr hlauhawm deuh zawng zawng kha ama lam aṭanga chhuak a ni - England tana khel phak a nihna a lang leh ṭhin.

Martinelli, Saka leh Gabriel ten remchang an insiam thei vek a, mahse an khung belh lo. Lacazette-a shot pawh goal pawnah chiah a kal. Mikhual Hammers lamin Pablo Fornals leh Jarrod Bowen te hmangin chance nei mah se keeper Aaron Ramsdale tan hna harsa a ni phak lo.

Arteta a lungawi
Mikel Arteta hi pa luhlul leh ngaihdan nghet tak nei a ni a, player a nih laia 'Smart' tak a nih avangin nungchang ṭha lo a ngai thei lo. Thuawih lo Auba pawh captain aṭangin a paih hmak a, inkhel tur zingah a telh lo bawk - Gabonese striker tel loin harsatna an tawk rih lo.

Arsenal manager chuan, "Thil tum mumal leh ṭha tak kan nei, chumi tihlawhtling tur chuan thawhhona ṭha kan mamawh. Ka naute lakah beisei ka nei sang, ka beisei ang tak pawhin an khel. Thawhhona ṭha a pawimawhzia a takin an lantir," a ti.

Arteta hian player a nih laia amah enkawl ṭhintu David Moyes hi a ngam angreng hle, vawi li a hmachhawn tawhah ṭum thum hnehna changin vawi khat chu an inhnehtawk - tun ṭumah pawh season bul ṭan fuh zawk West Ham hi kawng engkimah an awp bet.

December thla chhungin North London club hian Premier League bikah Leeds United, Norwich City leh Wolves te an la hmachhawn chhunzawm leh dawn, Kum thar zanah champion lai Manchester City an mikhual dawn bawk a ni.