June-ah Italy vs Argentina

European champion Italy leh Copa America nomawi kawltu Argentina inhmachhawn hun leh hmun tur chu tihchian a ni ta a, June 1, 2022 khian London khawpuiah an inkhel ang.

Finalissima tia hming lem an pek match khelhna tur stadium tak erawh tihchian a la ni lo a, chutihrual chuan London-a inkhel tur an nih dawn avangin Wembley Stadium-ah an intawn mai rinna a lian hle.

UEFA president Aleksander Ceferin chuan, "Hlim tak chungin national team trophy inchuhna tur match ropui tak chu kan thar thawh leh ta a ni," a ti a, UEFA leh CONMEBOL chuan Artemio Franchi Trophy leh Intercontinental Cup an lo huaihawt ho tawh thu a sawi lang bawk.

Khawmualpui pahnih hi football-ah an lo thawk dun fo tawh a, kum 1960 aṭang khan an khawmual champion ve ve chu an lo intawng tawh ṭhin - mahse, kum 2005 khan FIFA Club World Cup-ah an inchhung lut.

European football-a thuneitu sang ber UEFA leh South American football-a thuneitu sang ber CONMEBOL te hian FIFA-in kum hnih dana World Cup neih an rawtna chu na takin an lo dodal dun tawh a, a hnu lawkah Finalissima huaihawt turin pawl pahnih hi an inrem thung.

UEFA leh CONMEBOL hian kum 2028 thleng thawk dun turin inremna an ziak a, Finalissima hi tun bakah hian ṭum hnih dang la neih leh theih tur a ni - a hlawhtlin dan a zirin an khelh chhunzawm zel chance pawh a sang hle.