Mizoram basketball team chak chiang

71st Senior National Basket-ball Championships Men & Women – North East Zone khelh laiah, nimin khan Mizoram mipa team chuan an match hmasa ber khelin Tripura chu 124-8 in an sawp.

Basketball Federation of India (BFI) buatsaih inelna Shillong khawpuia neih laiah Mizoram lamin bul an ṭan fuh takzet a, inkhel tir aṭanga a tawp thlengin kawng tinrengin an chungnung - vawiin hian an match hnihna atan inelna thlengtu Meghalaya an hmachhawn leh ang.

Mizoram coach KC Lallian-tluanga chuan, "Tripura hi chu team nem an ni a, a tir aṭangin engmah harsatna kan nei lo. Player zawng zawng an khel ṭha vek a, minute khel hnemin point an nei hnem deuh mai a ni, kan tan fiahna tak a la ni lo deuh.

"Kan hmachhawn leh tur Meghalaya erawh team ṭha an ni. Tun hma chuan an hnen aṭangin thil tam tak kan zir ṭhin, tunah chuan hma kan sawn ve zel tawh a, anni hneh tur hian beiseina pawh kan nei sang, fimkhur takin kan khel ang," tiin Vanglaini a hrilh.

India ram pum hi zone panga - North Zone, South Zone, East Zone, West Zone leh North East Zone-ah te ṭhen a ni a, zone inelna hi kumin chhunga zawh fel tur a ni.

Final round-ah North, South, East leh West Zone ten team pathum an thawh thei a, North East Zone aṭang erawhin champion team chauh an tel thei dawn. Heng bakah hian Services, Indian Railways Team leh inelna thlengtu Tamil Nadu ten final round hi an hmachhawn ang.

Senior National Regional Basketball Championships hi January 23–30, 2022 hian Chennai, Tamil Nadu-ah khelh a ni dawn a, team 16 an inel dawn a ni.

Mizoram Result & Fixtures
December 16, Ningani
Mizoram 124 - 8 Tripura
December 17, Zirtawpni
Meghalaya 11:30 AM Mizoram
Nagaland 03:30 PM Mzioram
December 18, Inrinni
Manipur 11:30 AM Mizoram
December 19, Pathianni
Assam 04:30 PM Mizoram