Australian Open khel lo tur Pliskova

Hmeichhe tennis world number 4 Karolina Pliskova chu Australian Open 2022-ah kan hmu dawn lo, a ban hliam vangin training a la zawm pangngai thei lo a, inelna hmachhawn turin a inpeih hman dawn lo a ni.

Kum 29 mi Pliskova hian 2019 khan Melbourne Park-ah hian semifinal a lo thleng tawh. Nakkum January thlaa khelh turah hian thleng sang tura beisei zinga mi ni mah se, hliam vanga a chawlh rih a ngai ta zawk.

Season kal laia Wimbledon final kheltu Pliskova chuan, "Vanduaithlak takin training-na hmunah ka kut dinglam a hliam a, hei vang hian training ka nei pangngai thei rih lo. Loh theih lohna avangin Australian Open aṭanga ka inhnuhdawh a ngai," a ti.

Pliskova hma hian hmeichhe player langsar pahnih Serena Williams leh Bianca Andreescu te an inhnukdawk tawh. Mipa player ṭha Roger Federer chu a la inlan thei dawn lo tih a chiang tawh bawk, player dang pawh inhnukdawk an la awm chhunzawm a rinawm.

Australian Open khel tur hian covid-19 laka invenna (vaccine) lak ngei a ngai. Mipa singles champion lai Novak Djokovic chu vaccine la duh lo zinga mi a ni a, inelna a hmachhawn thei dawn em, tih a la chiang rih lo bawk.