Agueeeeroooooooooooooooooo I liam ang maw?

Premier League chanchinah 2011-12 season nomawi inchuh kha a ngaihnawm ber pawl a ni a, May 13, 2012-a thil thleng kha football fan-ten an theihnghilh tawh ngai lo ang.

Match tawp ber khelh niah Manchester City leh Manchester United-te an point hmuh zat a inang chiah a, goal difference vang chauhin City an sang zawk.

Season kharna match-ah hian United-in Wayne Rooney goal hmangin Sunderland chu 1-0 in an hneh a, hetihlai hian City erawh Queen Park Rangers lakah 2-1 in an hnufual thung.

United fan-ten nomawi chawi beiseina nen City result an nghak a, mahse, thil mak a thleng - hun pek belh minute hnihnaah Edin Dzeko chuan si phurh sutna goal a khung a, a la tawk lo cheu!

Mahse, minute 93 leh second 20-naah Aguero a rawn lang a, City chakna goal a rawn khung tehreng a nih kha - Etihad Stadium chu a chim dawn emaw tih mai turin thawm a ṭha a, City chak thu an hriat rualin United erawhin nguin takin dressing room lam an pan thung.

Lal a piang a...
Football commentator lar leh hming dai tawh ngai lo tur Martin Tyler chuan kha inkhel kha commentary a pe a, Aguero-a'n a pet goal rual chiaha 'Agueroooooooooooooo' tia a au chu football khawvelah theihnghilh a ni tawh lo ang.

Kum 1968 hnua a vawi khat nan City-in league nomawi an chawi a, an tan Lal thar a piang ta bawk - a hming chu Sergio Aguero a ni a, City-a a season hmasa berah hian match 48 khelin goal 30 a khung nghal.

Premier League-a an champion nomawi hmasa ber an chawi hnuah City an hawikir leh tawh lo a, vawiin thlengin European football-a team langsar ber pawl an nih chhunzawm ta - a bul ṭantu chu Aguero a ni.

City boss Pep Guardiola chuan, "Maradona chuan Italy-ah ro a rel a, Messi-a'n Spain-ah ro a rel a, Aguero chuan England-ah ro a rel thung. A statistic hian a sulhnu ropuizia a hrilhfiah," a ti a, ṭawmpui lo an tlem ang.

Manchester City legend hi Premier League-a player ropui ber pawl a ni a, City tan inelna hrang hrangah match 390 khelin goal 260 a khung a, heng zingah hian hattrick vawi 16 ngawt a tel!

Mahse maw...
Khawvela pa hausa ber pawhin a duh khawp a neih theih lohna khawvelah Aguero-a'n a duh aia hmain football a mangṭha a ngai ta - a lung ṭhat loh vang a ni.

Kartir khan Aguero-a'n Nou Camp-ah press conference a koh tur thu sawi a ni tawh a, fans tam zawkin lung lam harsatna avanga a inkhelh chhunzawm theih loh thu a sawi dawn niin an sawi.

Mahse, a hun a thlen meuh chuan awih a harsa - Nou Camp-a Aguero ṭhutna hnungah chuan a vanglaia a goal khung ropui tak tak leh a sulhnute tarlan a ni a, Argentine striker hian en pawh a en ngam lo.

August thla lawka Lionel Messi mittui tlakna hmunah khan Aguero pawh a mittui a tla a, hmuhnawm ti taka a inkhel kan en ṭhin striker khan a duh reng vang pawh ni loin football chu a mangṭha a ṭul ta si.

Kum 33 mi striker hian, "Ka hriselna ka ngaih pawimawh hmasak ber a ṭul a ni," a ti a, a thusawi ṭawmpui mah ila khelmuala kan hmu tawh lo tur erawh a 'na' a ni.

A har asin
October 30 khan Aguero hian Barca jersey hain Alaves a hmachhawn a, mahse, inkhelh laiin thawk lamah harsatna a neih avangin khelmualah enkawlna pek a ni a, lakchhuah niin damdawi in panpui zui a ni.

November thlatir khan Barca chuan an player hian thla thum chhung inenkawlna a kalpui tur thu an puang zui a, mahse, thla hnih pawh a ral hmain inkhelh a chawlhsan thu a puang ta.

Aguero hian cardiac arrhythmia (lung lam fel lo) a nei a, a dinhmun thlirin inkhelhpui zel chi a ni lo. Argentina international chuan, "Test kan neih hmasak ber khan medical staff-te chuan inkhelh ka chawlhsan a ngaih mai theih thu min hrilh.

"Kha ta ṭang khan ka rilru chu a inpuahchah tawh a, mahse, a awlsam lo hle. Doctor pakhat chuan tlang takin, "A tawk tawh e," tiin min hrilh a ni," a ti a, a tan boot khai mai loh chu duhthlan tur a awm loh thu a sawi.

Footballer tan chuan khelmuala nuam ti taka hun hman tluk a awm lo a, kum upat tawh avanga chawlte pawh an lung a leng ṭhin - hriselna ṭhat loh avanga chawlh ngai Aguero a khawngaihthlak a, a hmachhawp neih zawng zawngte an thamral ta.

Ka lawm zel ang!
Kum 33 mi striker hian nipui lai khan Etihad Stadium-ah a contract hmang zoin a thlawnin a chhuak a, club sawmtu tam tak nei mah se a ṭhianpa Lionel Messi khelhna Barca tana khelh a thlang a, mahse, thutlukna a siam fuh tawk lo.

Awmze nei loa an sum hman nasat luat Barca-in an tuar a, season tharah an player lei tharte pawh an ziak lut thei lawk lo a, Aguero-a'n Catalan club a pan chhan ber anga ngaih Messi pawh chelh thei loin Paris Saint-Germain lakah an chân.

Barca-in player hralh ṭhenin an harsatna an su kiang deuh a, Aguero pawh an ziak lut. Mahse, chawn hliamin a tlak buak a, a dam hnuah thawk lam harsatna avangin buaina a nei leh a, tunah chuan a chawl ta.

Catalan club tan match nga a khelha goal khat khungtu striker chuan, "In vai hnena ka sawi duh chu ka theihna zawng zawng ka hlan, tih hi a ni. Kum nga mi lek ni a ball ka tawh hmasak ber aṭang khan footballer nih ka duh a, Europe meuh ka thlen hi ka ring ngai lo.

"Hei vang hian ka khelhna hmun chu khawi pawh ni se in vai chungah lawmthu ka sawi a ni. Ka career-ah ka hlim a, a tira tun hun harsa ang ka tawng lo hi ka lawm takzet a ni. Ka hmaah engin nge min hmuak ka hre lo a, mahse, min hmangaih a, ka tana ṭha tur duhtu tam tak an awm tih ka hria," a ti a, mittui karah lungawina a zawng.

Hmangaihtu hmangaihna
Barcelona tana El Clasico-a hmachhawn chhuna goal khungtu Aguero chuan, "Kum 18 mi lek ka nih lai khan Atletico chuan Europe-ah ka hlawhtlin theih an beisei a, ka tan an neih an thap a ni," a ti a, Atletico chungah lawmthu a sawi.

Argentina tan vawi 101 inlana goal 41 khungtu Aguero hian an ram club Independiente-ah a career a ṭan a, match 56-a goal 23 a khung hnuin kum 2006 khan Atletico a zawm. Spanish club tan hian match 234 khelin goal 101 a khung a, Europa League-ah a champion pui bawk.

Kum 2011 khan ropui lehzual duhin City a zawm a, pound maktaduai 38-a an lei striker hian kum 2021-a City a chhuahsan dawn meuh kha chuan match 390-ah goal 260 a khung. Aguero chuan, "Manchester City-a mite u, engtiangin nge ka thinlungah hmun in chan chu in hria e. Ṭha taka min enkawl avang khan ka lawm takzet a ni," a ti.

Argentine striker chuan sawi zawmin, "Player chuan champion belh zel kan duh a, kei erawh ka nomawi chawi zawng zawng thlirin ka lungawi a ni. Kei leh ka club tan ka theihna sang ber ka hlan ṭhin a ni," a ti bawk.

Aguero hian Atletico tan Europa League leh UEFA Super Cup a champion bakah City tan Premier League nomawi panga, FA Cup (1) leh League Cup (6) nomawite a chawi a, Argentina tan Copa America nomawi chawiin Olympic gold medal a hlawh chhuak bawk a ni.

Aguero & sulhnu
Premier League-ah goal 184 khungin English mi ni lo zinga English top flight league-a goal khung hnem ber a ni a, amah hnaih bertu Arsenal legend Thierry Henry aiin goal kuain a khung hnem zawk. Aguero hian Premier League-a goal khung hnem lamah Alan Shearer (260), Wayne Rooney (208) leh Andrew Cole (187) chiah a phak lo.

Premier League-ah Aguero hi minute 108 dan zela goal khung ang a ni a, minutes-per-goal anga chhutin tluktu a nei lo. Minute 2,520 (28 games) chu goal khung loin la khel leh pawh ni se goal 20 chuangin minutes-per-goal nei ṭha ber a la ni tho ang! Argentine striker hian a career-ah vawi 18 hattrick a siam a, heng zinga 12 chu Premier League-ah a ni a, English top flight league record a ni. 2007-08 season leh 2019-20 season inkara season 13-a 12-ah khan inelna hrang hrangah goal 20 a khung tling ziah a, City-ah khan season khata goal 30 khung tlin vawi nga a nei!

City tan Champions League-ah goal 36 ngawt a khung a, Champions League-a English club pakhata tana goal khung hnem lamah Chelsea legend Didier Drogba nen an intluk. Team 128 lakah goal a khung a, Barcelona, Real Madrid, Bayern Munich, Chelsea, Liverpool leh Manchester United te pawh Aguero-a goal khung theih tuartu zinga mi an ni. November 2004 khan a career-a a goal hmasa ber chu Independiente tan a khung a, October 2021 khan Barcelona tan Real Madrid lakah a career goal hnuhnung ber a khung thung - a karah kum 16 leh ni 332 a tla.

Eng nge an sawi?
Premier League mai ni lo, football-a a sulhnu hnutchhiah a ropui takzet. A goal khungte leh goal pawimawh a khung theihziate kha - player ropui tak a ni a, ka hmachhawn tawh zinga a ṭha ber pawl a ni. - Jurgen Klopp, Liverpool boss

Khawvela striker awm tawh zinga ṭha ber pawl i ni a, i hma hun atan duhsakna ka hlan che, legend. Kan inhmu thuai dawn nia. - Kevin De Bruyne, Manchester City midfielder

Ka ṭhian, thutlukna siam harsa tak a ni ang tih ka ring. Mahse, ropui takin khelmual hi i chhuahsan ania aw - nang nena khelmual pawn leh chhunga hun kan hmang thei kha ka inchhuang takzet a ni. - David Silva,
Manchester City legend

Premier League striker ṭha ber a ni a, chu chu a sulhnu hnutchhiahin a pholang vek. - Khaldoon Al Mubarek, Manchester City chairman