Dortmund damna Haaland

Erling Braut Haaland hming lamrik rualin 'Goal' sawi zel a ngai. Borussia Dortmund striker ṭha mi hian Greuther Furth lakah goal hnih khungin a team hi 3-0 in hnehna a chanpui a, goal khat dang hi Donyell Malen khung a ni.

Bundesliga season kal laiah Bayern Munich an kal fal a, pahnihna Dortmund hian an thlah fal lutuk duh bik lo. Marco Rose-a naute hian champion lai Bayern nen an inkar an ti zim leh ta hret a, tunah chuan point ruk chauhin an inthlau leh ta.

Haaland leh goal
Signal Iduna Park-a inkelah ni dang ang bawkin Haaland chu a changtupa a ni leh. Table mawngphah luahtu Furth hi inveng rei thei viau mah se an inveng tluan thei lo, minute 33-naa an penalty chawi chu striker Haaland-a'n a khung.

Second half-ah pawh goal a luh chhunzawm mai bik lo. Hun tawp dawn thlengin Furth an ṭang thei viau, minute 82-naah Julian Brandt-a freekick chu Haaland bawkin a tauh lut a, chak tur a chian hnuah substitute Malen-a'n a khung belh ve bawk.

Kum 21 mi Haaland hian season kal laiah Dortmund tan inelna hrang hrangah match 15 a khelh aṭangin goal 19 a khung leh tawh a, league bikah match 10 aṭangin goal 13 a khung - ani hi zawng goal khung tur bika piang a ni.

Thawhrim rah
An elpui ber Bayern an ngam loh ṭhin avangin Dortmund tan champion a harsa, an player ṭha an chelh thei lo ṭhin bawk. Coach Rose pawhin an dinhmun hi a hrethiam a, chutih rualin a naute thawhrimnaah a lawm hle.

Rose chuan, "Inkhel kha ngun taka kan en a nih chuan kan thunun hle tih a hmuh theih. Goal khung theihna hun remchang kan nei hnem, chutih rualin kan mamawh zat goal kan neih theih avang erawh chuan a lawmawm hle," a ti.

Dortmund hian thlasik chawlh an hman hmain match khat an la khel leh dawn. Inrinni zanah table mawngphah lama talbuai lai Hertha Berlin an lenchilh ang, hnehna chang chung ngeia krismas hman an tum ang.