A chang chuan kan in haw ṭhin - Verstappen

Max Verstappen chuan Lewis Hamilton nen an inelna chungchang a sawi chhuak a, a elpui Mercedes driver nen hian a chang chuan in huat chang an neih hial thu a sawi chhuak - an thil tih dan chhut chian chuan a mak hran lo.

Tun season Formula 1 intlansiak hnuhnung ber Abu Dhabi Grand Prix-ah Max hian a hmaa tlan Hamilton a tlan pel a, inelna boruak sang tak karah world champion a ni.

Dutch tlangval Verstappen chuan, "Kan mitah chiang taka inen chang kan nei, chutah chuan inelna boruak sang leh nung tak neih kan cho tih hi a lo lang ṭhin, tlankawngah na takin kan inum zui ṭhin bawk.

"A chang chuan in huat chang kan nei, mahse hei chu thil kalphung pangngai a ni. Infiammi kan ni a, theihtawp chhuah duh ve ve kan nih avangin boruak pawh a sang ṭhin," tiin a sawi.

Red Bull driver hian Hamilton lak aṭangin nomawi a chhuhsak thei a, season tharah pawh anni pahnih bawk hi inelna hmuhnawm chhawp chhuak tur an ni ang.