New Orleans chakna Graham

Nimin zing NBA inkhelah thil danglam bik kan hmu. Hun tawp hma 1.4 seconds chauh awm tawhah Devonte Graham chuan 61ft zet a hla aṭangin 3-points a vawm lut a, a team New Orleans Pelicans chu Oklahoma City Thunder lakah 113-110 in hnehna a chanpui.

Team pahnih an inkhel tawk hle a, hun tawp dawnah pawh an point hmuh zat a inang. Mahse, hamrik hnuhnung a rik rualin Graham hian tun hnai kum 25 chhunga 3-points lut hla ber chu a vawm lut a, ropui takin a team a chakpui.

Pelicans chak theih nana point 34 neitu Brandon Ingram chuan, "Kan khel ṭha vek, theihtawp kan chhuah avangin a tawpa lawm zawk kan ni. Chutihrualin hun tawp dawna Graham thil tih kha sawi hmaih theih a ni lo.

"Hla tak aṭangin a shot dawn tih kha chu ka hmu, beiseina chu nei mah ila a luh ka ring ngam lo. Mahse, kan duh leh beisei ang takin a hunah tak ni bawk point kan neih belh a, a ropui takzet a ni," tiin a sawi.

Nimin zing inkhel dangah Los Angeles Lakers chuan Dallas Mavericks chu 107-104 in an hneh a, tun hnaiah Lakers hi a zawnin vawi thum an chak ve ta - season tir lamah tluk leh din fawmin kal mah se, player ṭha awmna an nih miau avangin an tho chhuak.

Miami Heat chuan hri leng vangin player chhawr theih loh an ngah, nimin zing khan inkhel thei player 10 chiah an nei. Player inlan thei tlem mah se an khingpui Philadelphia 76ers chu 101-96 in an hneh ta tho a ni.

NBA Results
Houston Rockets 89 - 124 Cleveland Cavaliers
Indiana Pacers 99 - 114 Milwaukee Bucks
LA Clippers 103 - 124 Utah Jazz
Atlanta Hawks 111 - 99 Orlando Magic
New Orleans Pelicans 113 - 110 Oklahoma City Thunder
Memphis Grizzlies 113 - 103 Portland Trail Blazers
Miami Heat 101 - 96 Philadelphia 76ers
Charlotte Hornets 131 - 115 San Antonio Spurs
Washington Wizards 105 - 119 Sacramento Kings
LA Lakers 107 - 104 Dalls Mavericks
Minnesota Timberwolves 124 - 107 Denver Nuggets